La Regenza ha avert la consultaziun tar la revisiun parziala dal dretg fiscal chantunal. Cun il project vegn realisada en il dretg chantunal l'aboliziun da l'imposiziun da taglia sin la valur da l'atgna locaziun, ch'è vegnida concludida en il dretg federal. Ultra da quai duai vegnir introducida ina taglia immobigliara speziala sin immobiglias secundaras che servan per gronda part a l'agen diever. A medem temp stgaffescha il project las basas che permettan er a las vischnancas e baselgias d'introducir ina taglia respectiva.

Tar las immobiglias secundaras procura l'aboliziun da l'imposiziun da taglia sin la valur da l'atgna locaziun – tenor stimaziuns – per perditas d'entradas da circa 40,5 milliuns francs per onn. Sco cumpensaziun duai vegnir introducida ina taglia immobigliara speziala chantunala sin immobiglias secundaras che servan per gronda part a l'agen diever. La taglia duai vegnir incassada sin la valur da la taglia sin la facultad da l'immobiglia. Per il chantun vegn proponida ina tariffa da taglia dad 1,5 promils. Per motivs da la segirezza giuridica vegn stgaffida ina nova disposiziun en la Constituziun chantunala. Quella permetta d'incassar la taglia immobigliara speziala mo sin immobiglias secundaras. Il cuntegn da la nova disposiziun constituziunala correspunda a quel da la Constituziun federala midada, ch'il pievel ed ils chantuns han acceptà cun clera maioritad ils 28 da settember 2025.

Las vischnancas e las baselgias duain decider en moda autonoma
Tras l'aboliziun da l'imposiziun da taglia sin la valur da l'atgna locaziun d'immobiglias secundaras vegni stimà, che las vischnancas perdian mintg'onn var 32,5 milliuns francs. La Regenza vul pussibilitar a las vischnancas d'incassar ina taglia immobigliara speziala sco cumpensaziun per l'aboliziun da l'imposiziun da taglia sin la valur da l'atgna locaziun.

Per minimar la lavur da las vischnancas, prevesa il project da consultaziun ina regulaziun concisa: Ils princips da la taglia immobigliara speziala vegnan fixads sin plaun chantunal. Las vischnancas decidan en moda autonoma, sch'ellas vulan introducir ina tala taglia u betg. En cas ch'ellas introduceschan questa taglia, ston ellas mo anc fixar l'autezza da la taglia en lur lescha da taglia.

Tras l'aboliziun da l'imposiziun da taglia sin la valur da l'atgna locaziun sin immobiglias secundaras vegni stimà, che la Baselgia evangelica refurmada dal Grischun perdia 500 000 francs, las plaivs evangelicas 1,7 milliuns francs e las plaivs catolicas 1,8 milliuns francs. La Regenza vul er pussibilitar a las baselgias d'introducir ina taglia immobigliara speziala. Er questa regulaziun è concisa, per che las baselgias che vulan introducir ina tala taglia, stoppian mo anc fixar l'autezza da la taglia.

La deducziun per lavurs da la tgira da monuments resta
La Confederaziun surlascha als chantuns da decider, sche las investiziuns en mesiras per spargnar energia e per proteger l'ambient duain vinavant pudair vegnir deducidas da las entradas suttamessas a la taglia. Il medem vala per la deducziun per ils custs da demoliziun en vista ad in edifizi cumpensatoric e per la deducziun per lavurs da la tgira da monuments. La Regenza s'exprima da princip cunter mesiras directivas fiscalas. Ella considerescha ils instruments da la promoziun directa sco pli transparents e pli orientads a las finamiras. I vegn vitiers, che la valur da l'atgna locaziun na vegn en l'avegnir betg pli suttamessa a la taglia. Per consequenza duain las deducziuns per mesiras per spargnar energia e per proteger l'ambient sco er per ils custs da demoliziun en vista ad in edifizi cumpensatoric vegnir abolidas. La deducziun per lavurs da la tgira da monuments duai dentant vegnir mantegnida, perquai che questas lavurs na vegnan per regla betg fatgas voluntarmain. Questa soluziun correspunda a quella da la taglia federala directa.

Co vinavant?
Suenter la terminaziun da la procedura da consultaziun vegn la Regenza a deliberar sia missiva per mauns dal Cussegl grond. La Regenza ha la finamira da metter en vigur las midadas da las leschas chantunalas a medem temp sco las disposiziuns dal dretg federal per il 1. da schaner 2029. La midada da la Constituziun chantunala è suttamessa al referendum obligatoric.

La Regenza sa stenta, che las vischnancas e las baselgias possian adattar a temp lur leschas da taglia.

Ils documents da consultaziun èn ussa disponibels
La consultaziun dura dals 27 d'avust 2026 fin ils 27 da november 2026. Ils documents appartegnents pon vegnir consultads sin la pagina d'internet dal chantun Grischun.

Infurmaziuns:

• President da la Regenza Martin Bühler, schef dal Departament da finanzas e vischnancas, tel. +41 81 257 32 05, e‑mail Martin.Buehler@dfg.gr.ch
• Toni Hess, manader dal Servetsch giuridic e vicemanader da l'Administraziun da taglia, tel. +41 81 257 33 26, e‑mail Toni.Hess@stv.gr.ch
• Estefania Monge, manadra da la partiziun Legislaziun e consulenta, Administraziun da taglia, tel. +41 81 257 34 76, e‑mail Estefania.Monge@stv.gr.ch

Responsabladad: Regenza