Las persunas responsablas dal chantun, da las vischnancas e da la mastergnanza han discutà oz davart la situaziun actuala en la Val Calanca. Malgrà lavurs intensivas resta la situaziun pretensiusa. L'Uffizi da construcziun bassa persequitescha parallelamain duas soluziuns per restabilir uschè svelt e segir sco pussaivel la cuntanschibladad da la part sura da Val Calanca.

La situaziun en la part sura da la Val Calanca occupa da medema maniera la populaziun, la mastergnanza locala, il turissem ed il chantun. Perquai èn represchentants da l'Uffizi da construcziun bassa, la presidenta communala da Calanca, il president communal da Rossa, represchentantas e represchentants da la vischnanca da Buseno, ils stabs directivs communals sco er in represchentant da la mastergnanza sa scuntrads al lieu per giuditgar la situaziun actuala e per discutar cuminaivlamain l'ulteriur proceder. La dumonda centrala è stada, co che l'access da la val po puspè vegnir garantì uschè svelt sco pussaivel sut las cundiziuns da segirezza ch'èn avant maun.

Cundiziuns meteorologicas constantamain difficilas engrevgeschan las lavurs da segirada e da rumida
Dapi las malauras da gievgia, ils 20 d'avust 2026, lavura l'Uffizi da construcziun bassa cun tutta forza vi da la segirada e la rumida dals trajects da via pertutgads. La pli gronda sfida resta il terren instabil sur la Pont Nef tranter Buseno ed Arvigo: «Anc adina sa chatta blera grippa lucca sin la spunda. Quest material po sa metter en moviment da tut temp», declera l'inschigner chantunal Reto Knuchel. Per motivs da segirezza ston las lavurs da rumir la grippa e la via adina puspè vegnir interruttas en cas da precipitaziuns. La protecziun da las collavuraturas e dals collavuraturs ha emprima prioritad.

Avertura en il decurs da l'emna proxima e construcziun d'ina punt provisorica
L'Uffizi da construcziun bassa persequitescha per il mument parallelamain duas mesiras per puspè pudair avrir uschè svelt sco pussaivel e duraivlamain la via da Calanca.

D'ina vart vegnan installadas a partir dad oz gievgia pliras raits da segirezza en il sectur periclità tar la Pont Nef. Questas raits èn la premissa, per che la via sutvart possia vegnir rumida senza privel. L'Uffizi da construcziun bassa quinta da pudair avrir puspè la via da Calanca per il traffic en il decurs da l'emna proxima. La reavertura vegn dentant l'emprim ad esser pussaivla mo durant il di e mo cun restricziuns. Durant il di ston vinavant vegnir fatgas lavurs da segirada e da rumida intensivas. Per mancanza da spazi e per motivs da segirezza n'èsi betg pussaivel d'exequir lavurs sin il plazzal e da laschar circular il traffic a medem temp. Ultra da quai vegn il traject surveglià cuntinuadamain durant il di. Sche las cundiziuns meteorologicas èn disfavuraivlas, vegn l'Uffizi da construcziun bassa puspè a serrar preventivamain la via per motivs da segirezza.

Da l'autra vart ha l'Uffizi da construcziun bassa cumenzà cun las lavurs da planisaziun per construir ina punt provisorica d'in vial. Circa 120 meters al sid da la Pont Nef existenta duai questa punt d'atschal manar sur la Calancasca vi da l'autra vart da la val. Là duai vegnir construida ina via provisorica che maina curt suenter la Pont Nef existenta puspè en la via chantunala actuala. «Quest sviament guntgescha dal tuttafatg il traject periclità e pudess restar avert senza restricziuns er la notg ed en cas da plievgia», explitgescha l'inschigner chantunal Reto Knuchel. Per la construcziun dovra quai previsiblamain 3 fin 4 emnas.

Finamira cuminaivla: in'avertura segira e fidabla
Al barat dad oz èn ins stà unanimamain da l'avis, che tuttas duas variantas dovrian lur temp e stoppian vegnir cumparegliadas minuziusamain ina cun l'autra. L'Uffizi da construcziun bassa vegn a cuntinuar intensivamain cun las lavurs da rumida ed ad accelerar la construcziun da la punt provisorica. Il chantun stat en stretg contact cun las vischnancas pertutgadas e fa tut per restabilir uschè svelt sco pussaivel la cuntanschibladad da la part sura da la Val Calanca.

Visualisaziun:

Visualisaziun dal trassé provisoric cun punt provisorica

Infurmaziuns:

Reto Knuchel, Uffizi da construcziun bassa, tel. +41 81 257 37 01 (cuntanschibel da las 14.30 fin las 15.30), e‑mail Reto.Knuchel@tba.gr.ch

Responsabladad: Uffizi da construcziun bassa