A partir da mesemna saira, ils 2 da settember 2026, a las 18.00 po l'Uffizi da construcziun bassa puspè avrir in vial da la via da Calanca per il traffic. Perquai che las lavurs da segirada e da construcziun en il sectur da la Pont Nef vegnan cuntinuadas, è la reavertura colliada cun restricziuns.

Suenter che l'Uffizi da construcziun bassa ha segirà durant ils dis passads il sectur privlus e rumì la via, po la colliaziun cun la part sura da la Val Calanca vegnir restabilida. Parallelamain vegnan cuntinuadas las lavurs vi da la punt provisorica (guardar communicaziun a las medias dals 27 d'avust 2026).

Via averta cun restricziuns
Mesemna, ils 2 da settember 2026, a partir da las 18.00 vegn in vial da la via da Calanca puspè avert. Per motivs da segirezza e da manaschi datti anc tschertas restricziuns. La via è averta mo durant il di tranter las 06.30 e las 20.30. Pervia da las lavurs sin il plazzal ston ins quintar cun curts temps da spetga. En cas da fermas precipitaziuns po l'Uffizi da construcziun bassa puspè serrar preventivamain la via per motivs da segirezza.

Fotografias:

Infurmaziuns:

Andrea Peduzzi, schef dal district 2 Mesauc, Uffizi da construcziun bassa, tel. +41 91 822 81 15 (cuntanschibel da las 15.30 fin las 16.30), e‑mail Andrea.Peduzzi@tba.gr.ch

Responsabladad: Uffizi da construcziun bassa