En la procedura penala pertutgant la bova al Piz Cengalo ha la Dretgira regiunala Malögia declerà cumplainamain nunculpants ils dus collavuraturs da l'Uffizi da guaud e privels da la natira sco er in geolog extern che ha lavurà per incumbensa da l'uffizi. Er duas ulteriuras persunas inculpadas da la vischnanca da Bregaglia èn vegnidas decleradas nunculpantas.

Il chantun Grischun e l'Uffizi da guaud e privels da la natira (UGP) prendan enconuschientscha dal fatg che ses collavuraturs èn vegnids declerads nunculpants. «Suenter ina procedura ch'è sa tratga a la lunga essan nus levgiads, ch'ina sentenzia d'emprima instanza è ussa avant maun e che las persunas inculpadas èn vegnidas decleradas nunculpantas», di Urban Maissen, manader da l'Uffizi da guaud e privels da la natira.

Las consequenzas da la bova al Piz Cengalo restan en trista memoria. «Noss patratgs èn tar las surviventas ed ils survivents che han pers lur confamigliars», di Urban Maissen.

Infurmaziuns:

Urban Maissen, selvicultur chantunal, manader da l'Uffizi da guaud e privels da la natira dal Grischun, e‑mail Urban.Maissen@awn.gr.ch (naginas infurmaziuns per telefon)

Responsabladad: Uffizi da guaud e privels da la natira