La Regenza ha concedì contribuziuns chantunalas per in project da protecziun cunter lavinas a Samignun, per la retschertga da l'istorgia da l'economia grischuna sco er per in project da perscrutaziun da la Fundaziun da funtaunas da dretg.
Dapli segirezza cunter lavinas en la Val Samignun
La Regenza ha approvà il project da la vischnanca da Samignun «Siglientada da lavinas Samignun, cumplettaziun da las pitgas per siglientar lavinas en il territori Munschuns». La Confederaziun ed il chantun sa participeschan al project cun maximalmain 367 500 francs en il rom da la Cunvegna da program da la nova gulivaziun da finanzas (NGF) «Privels da la natira gravitativs tenor la Lescha dal guaud». Plinavant ha la Regenza concedì ina contribuziun chantunala da maximalmain 61 250 francs. Per quest project vegni fatg quint cun custs totals da 490 000 francs.
Dapi l'onn 2006 vegnan las lavinas da la costa sid-sidost dal Piz Munschuns en la Val Samignun siglientadas sur trais pitgas fixas. L'onn 2016 è l'indriz vegnì cumplettà cun ina quarta pitga. Entant che la part vest dal territori da lavinas po vegnir segirada efficaziamain, è la protecziun en la zona da distatga ost sut Crapalb manglusa. Ils onns 2018 e 2021 han lavinas spontanas cuvert là la via chantunala e la via da colliaziun. Siglientadas da lavinas or dal helicopter han mo in effect moderà en quest sectur ed èn pussaivlas pir, cura che las navaglias han chalà e sche la vista è suffizienta. En il rom dal project actual duain perquai dus ulteriurs indrizs fixs per siglientar lavinas procurar per dapli segirezza en il territori Crapalb.
Infurmaziuns: Departament d'infrastructura, energia e mobilitad
La Regenza ha approvà il project da la vischnanca da Samignun «Siglientada da lavinas Samignun, cumplettaziun da las pitgas per siglientar lavinas en il territori Munschuns».
Contribuziun chantunala per perscrutar l'istorgia da l'economia grischuna
La Regenza sustegna il project «Istorgia da l'economia grischuna» cun ina contribuziun chantunala da 200 000 francs. Uschia ademplescha ella ina dumonda correspundenta da l'Institut per la perscrutaziun da la cultura grischuna (icg) che vegn ad elavurar – en il rom dal project – ina preschentaziun generala dal svilup economic dal chantun dapi il 19. tschientaner. Ils custs totals per realisar las lavurs da perscrutaziun sco er per sviluppar e manar la pagina d'internet (plattafurma dal project) importan 600 000 francs.
Fin ussa èn mo tscherts secturs da l'istorgia da l'economia grischuna perscrutads sistematicamain. Bain existan numerus studis individuals davart temas sco turissem, traffic, forza idraulica, agricultura, mastergn, industria, migraziun u economia da construcziun; ina preschentaziun generala moderna dal svilup economic dal chantun che cumpiglia tut las epocas dapi il 19. tschientaner, manca dentant fin oz. Gist quai è il punct da partenza dal project planisà. El retschertga il svilup economic dal chantun Grischun dal 19. tschientaner fin oz e metta in accent spezial sin la fin dal 19. tschientaner sco er sin il 20. tschientaner. La finamira è da serrar largias centralas en la perscrutaziun da l'istorgia economica e da revelar novas perspectivas sin il svilup dal chantun. Il project è vegnì inizià l'onn 2025 a chaschun dal giubileum «125 onns Uniun grischuna d'artisanadi e mastergn». Il cuntegn vegn elavurà fin la fin da l'onn 2029 resp. fin la primavaira 2030. L'ovra duai vegnir publitgada l'atun 2030.
Infurmaziuns: Departament d'educaziun, cultura e protecziun da l'ambient
La Regenza sustegna il project «Istorgia da l'economia grischuna» cun ina contribuziun chantunala da 200 000 francs.
Contribuziun chantunala per in project da perscrutaziun da la Fundaziun da funtaunas da dretg
La Regenza sustegna il project «Statuts e protocols da la Lia Sura 1528–1795» da la Fundaziun da funtaunas da dretg cun ina contribuziun chantunala da 460 000 francs.
La Fundaziun da funtaunas da dretg da la Societad svizra dals giurists è ina interpresa da perscrutaziun che publitgescha e renda accessiblas funtaunas dal dretg vegl fin l'onn 1798. Il project planisà sa deditgescha a l'ediziun dals protocols da la Lia Sura u Lia Grischa, che cuvran la perioda da 1585–1795. Quests protocols permettan da studegiar ils detagls ed il funcziunament concret da la rolla e da la funcziun dal «plaun statal mesaun» da questa lia singula tranter las vischnancas ed il plaun dal Stadi da las Trais Lias. Tut en tut vegn l'ediziun a promover fermamain l'istoriografia grischuna ed en spezial l'istorgia dal dretg grischun, e quai sin basa da funtaunas e da fatgs.
Infurmaziuns: Departament d'educaziun, cultura e protecziun da l'ambient
La Regenza sustegna il project «Statuts e protocols da la Lia Sura 1528–1795» da la Fundaziun da funtaunas da dretg cun ina contribuziun chantunala da 460 000 francs.
La Regenza ha surdà l'incumbensa d'elavurar ina strategia chantunala cunter la criminalitad organisada
Il Cussegl federal ha approvà il december 2025 la Strategia naziunala per cumbatter la criminalitad organisada. I sa tracta da l'emprima strategia da tal gener. Gia en il Program da la Regenza 2025 fin 2028 ha la Regenza grischuna mess in accent sin la persecuziun penala. En coordinaziun cun la Strategia da la Svizra per cumbatter la criminalitad organisada duai quest accent ussa vegnir extendì sin l'entira administraziun. Per quest intent dovri ina strategia per l'entira administraziun, che integrescha en la prevenziun, en l'identificaziun tempriva ed en il cumbat tut ils secturs administrativs ch'èn relevants per la segirezza.
La Regenza ha incumbensà il Departament da giustia, segirezza e sanadad (DGSS) d'elavurar ina strategia chantunala cunter la criminalitad organisada. Plinavant ha il DGSS survegnì l'incarica da laschar far in'expertisa giuridica. Quella duai analisar las basas giuridicas vertentas, ils cunfins e las libertads d'agir dal barat d'infurmaziuns tranter las autoritads per cumbatter la criminalitad organisada en il chantun Grischun. Ultra da quai duai l'expertisa preschentar ils resultats s'orientond a la pratica.
Infurmaziuns: Departament da giustia, segirezza e sanadad
Il Cussegl federal ha approvà il december 2025 la Strategia naziunala per cumbatter la criminalitad organisada.
