En il rom dal dialog regular cun il chantun Grischun ha la Regenza grischuna retschavì oz il cusseglier federal Ignazio Cassis a Soglio. Il discurs cun il minister da l'exteriur ha dà l'occasiun da sclerir differents giavischs dal chantun Grischun e d'approfundar temas transcunfinals. L'inscunter è vegnì stgirentà dal grev accident d'autocar en Engiadina Bassa, nua che pliras persunas han pers lur vita la gievgia saira.

Gia per la novavla giada dapi ch'el è entrà en uffizi l'onn 2017, è il cusseglier federal Ignazio Cassis s'inscuntrà cun la Regenza grischuna per in barat uffizial. Quella giada aveva il minister da l'exteriur lantschà il dialog politic regular cun il Grischun per discutar las sfidas ed ils giavischs particulars dal chantun triling e per rinforzar il barat d'infurmaziuns tranter il Cussegl federal e la Regenza. Ultra da quai duai il dialog gidar ad accentuar l'impurtanza da la Svizra taliana e rumantscha sco part da la diversitad svizra.

L'inscunter da quest onn è vegnì stgirentà da tristezza e consternaziun. En il tragic accident d'autocar tranter Susch e Zernez han pliras persunas pers ier saira lur vita. Durant ina minuta da silenzi han il cusseglier federal Ignazio Cassis e la Regenza grischuna commemorà las victimas ed admess als confamigliars lur sincera condolientscha.

Dialog davart la collavuraziun transcunfinala e la plurilinguitad
Il dialog politic ha cumenzà cun in barat davart la participaziun anc adina pendenta da la regiun Lumbardia als custs dal concept da traffic dal chantun Grischun per ils Gieus olimpics d'enviern 2026. In ulteriur punct da la glista da tractandas cuminaivla è stada l'execuziun da la cunvegna davart l'imposiziun dubla da taglia per las cunfinarias ed ils cunfinaris. Suenter ha il cusseglier federal Ignazio Cassis infurmà la Regenza grischuna davart il proxim dialog annual tranter la Svizra e l'Italia en connex cun la collavuraziun transcunfinala.

Ulteriurs temas dal dialog dad oz èn stads la proxima ediziun da l'emna internaziunala da la lingua rumantscha «Emna rumantscha» sco er il program da barat «Piccolo Erasmus». Vegnì discutà èsi er davart la festa da giubileum da 500 onns lingua rumantscha scritta, che ha lieu la stad vegninta a Zuoz cun il gieu al liber «Battibuogl».

Ultra da quai ha l'inscunter dà l'occasiun da discurrer davart ils pli novs svilups geopolitics sco er davart il stadi dal pachet per renovar e sviluppar vinavant las relaziuns tranter la Svizra e la UE, che vegn actualmain debattà en il parlament. Suenter il discurs politic ha la Regenza grischuna envidà la populaziun da Soglio ad in barat cun il cusseglier federal Ignazio Cassis.

Fotografias agiuntadas:

Ulteriuras Fotografias da l'inscunter vegnan messas a disposiziun uschè svelt sco pussaivel en quest lieu.

Infurmaziuns:

President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch

Responsabladad: Regenza