La Regenza ha prendì enconuschientscha dal rapport final 2023 fin 2025 davart il program graubündenVIVA ed ha a medem temp approvà la cuntinuaziun dal program per ils onns 2027 fin 2031. Per quest intent ha ella garantì a l'uniun graubündenVIVA ina contribuziun chantunala da maximalmain 4,95 milliuns francs en il rom d'ina cunvegna da prestaziun che sto anc vegnir concludida. Il sistem alimentar regiunal e la valurisaziun persistenta duain uschia vegnir rinforzads vinavant, ed il Grischun duai vegnir posiziunà sco regiun predominanta da la cultura alpina da giudiment.

graubündenVIVA collia acturas ed acturs dals secturs agricultura, producziun, turissem, gastronomia, commerzi, perscrutaziun sco er furmaziun e promova il barat da savida ed il svilup da projects cuminaivels. En la proxima fasa da program vegnan cuntinuadas las activitads da fin ussa. Ellas vegnan dentant focussadas pli fitg ed orientadas als resultats. Uschia tegna la Regenza er quint da las enconuschientschas fatgas durant las fasas da program passadas. En il center da la proxima perioda da program stattan tschintg finamiras strategicas: etablir il Grischun sco regiun predominanta per la cultura alpina da giudiment, rinforzar il sistem alimentar regiunal, promover la valurisaziun persistenta, sustegnair l'abilitad d'innovaziun e da cumpetenza da las acturas e dals acturs participads sco er francar meglier il nutriment regiunal en la societad.

Per ils onns 2027 fin 2031 è previs in budget total da circa 5,55 milliuns francs. La participaziun dal chantun importa maximalmain 4,95 milliuns francs; ulteriurs 600 000 francs vegnan finanziads tras agens meds, contribuziuns da commembranza ed auters meds finanzials da terzs. Las contribuziuns chantunalas na vegnan pia betg midadas en cumparegliaziun cun la fasa da program 2022 fin 2026.

Infurmaziuns: Departament d'economia publica e fatgs socials

La Regenza ha approvà la dumonda dal Center da furmaziun per la sanadad ed ils fatgs socials (CFSS) per la fasa II da la sanaziun da las cuvridas dals palantschieus sco er da la renovaziun da las cuschinas e da la recepziun en l'edifizi da locaziun a la Gürtelstrasse 42/44 a Cuira. En il senn da las basas giuridicas ha ella ultra da quai garantì al CFSS ina contribuziun da construcziun da maximalmain 2,46 milliuns francs.

Il CFSS è cumpetent per scolaziuns e furmaziuns supplementaras en il sectur da las professiuns da sanadad e dals fatgs socials. Per quest intent ha el prendì en locaziun l'onn 2007 l'immobiglia a la Gürtelstrasse 42/44 a Cuira. En il rom da las lavurs da construcziun vegnan sanadas pass per pass las cuvridas actualas dals palantschieus. Plinavant survegnan las cuvridas ina nova sigillada. Tras in nov concept da colurs e da material sco er tras in mobigliament flexibel vegnan ils locals interns a medem temp optimads e transfurmads en in ambient d'emprender attractiv e modern. Ultra da quai duain mesiras acusticas cumplementaras meglierar la qualitad dal segiurn, ed il sectur da la recepziun duai vegnir concepì da nov ed engrondì en direcziun dal corridor. Vi dal program da spazi existent e vi da l'utilisaziun actuala dal spazi na datti uschiglio naginas midadas. Il CFSS prevesa da laschar realisar las mesiras architectonicas previsiblamain en quatter etappas (2026 fin 2029). Las lavurs èn mintgamai planisadas durant il temp ch'i n'è betg scola.

Infurmaziuns: Departament d'educaziun, cultura e protecziun da l'ambient

La Regenza ha approvà la dumonda da la fundaziun «Gott hilft» per la fasa II dal mantegniment da la Scola-dimora Zizers. Ultra da quai ha ella garantì a la fundaziun ina contribuziun chantunala da construcziun en il senn da la Lescha chantunala davart las scolas popularas sco er da la Lescha chantunala d'integraziun da persunas cun impediments. Il project custa tut en tut circa 2,38 milliuns francs. A quests custs paja il chantun ina contribuziun dad 1,96 milliuns francs.

La Scola-dimora Zizers è ina instituziun da la scolaziun speziala ch'è renconuschida dal chantun. Ella porscha plaz ad uffants e giuvenils cun difficultads d'emprender e da cumportament. Las tschintg chasas da la Scola-dimora dateschan da diversas epocas ed èn per part vegnidas renovadas e mantegnidas correspundentamain. Per ch'ils edifizis restian en in bun stadi architectonic e per ch'il manaschi da scola possia vegnir garantì, èsi necessari ils proxims onns da far diversas renovaziuns vi dals mirs exteriurs e vi da la tecnica dals edifizis.

Infurmaziuns: Departament d'educaziun, cultura e protecziun da l'ambient

La Regenza ha elegì Valérie Favre Accola per il 1. da schaner 2027 sco represchentanta dal chantun Grischun en il «Comitato direttivo del Forum per l'italiano in Svizzera». Il 1. da schaner 2027 entra Valérie Favre Accola er en uffizi sco cussegliera guvernativa. Questa represchentanza chantunala vegn ella pia a surpigliar sco scheffa dal Departament d'educaziun, cultura e protecziun da l'ambient.

Ils 30 da november 2012 ha gì lieu a Turitg l'emprima sesida constitutiva dal «Forum per l'italiano in Svizzera». Dal cumenzament ennà èn ils dus chantuns da la Svizra taliana, il Tessin ed il Grischun, sco er l'organisaziun da las commembras e dals commembers italofons da l'Assamblea federala stads participads a l'installaziun dal forum. L'intent dal forum è tranter auter da rinforzar cun stentas cuminaivlas la posiziun da la lingua taliana en la Svizra quadrilingua.

Infurmaziuns: Departament d'educaziun, cultura e protecziun da l'ambient