Passa 60 cussegliaziuns durant l'emprim onn, in ferm sustegn tras l'instrument da lavur «Cumpass» ed in cler signal per l'avegnir: Suenter in onn manaschi da pilot tira la Cussegliaziun spezialisada per la protecziun d'uffants dal chantun Grischun in'emprima bilantscha. I vegn fatg diever da la purschida che serra ina impurtanta largia en il sistem chantunal da la protecziun d'uffants.

Sch'il bainstar d'in uffant u giuvenil fa quitads, èsi d'agir svelt e segir. Gist qua cumenza la Cussegliaziun spezialisada per la protecziun d'uffants, ch'è vegnida iniziada avant in onn en il chantun Grischun en il rom d'in project da pilot (Communicaziun a las medias dals 8 da settember 2025).

La purschida da cussegliaziun vegn utilisada en l'entir chantun
Las passa 60 dumondas durant l'emprim onn – repartidas sur l'entir chantun, da l'Engiadina fin en la Surselva – mussan ch'i vegn fatg diever activamain da la purschida. Ord vista da las persunas spezialisadas e da referiment è ella in sustegn ed ina purschida utila. Spezialmain savens vegn la Cussegliaziun spezialisada per la protecziun d'uffants consultada per situaziuns che duran gia pli ditg u ch'èn cumplexas. En tschertas situaziuns po la valitaziun vegnir extendida tras la gruppa da focus interdisciplinara che sa cumpona da tschintg expertas ed experts dals secturs medischina, psichiatria d'uffants e giuvenils, polizia, protecziun d'uffants e da creschids sco er agid a victimas. Las discussiuns da cas portan clerezza e rinforzan la segirezza d'agir da las persunas che tschertgan cussegl.

L'instrument da lavur «Cumpass» furnescha parallelamain ina contribuziun impurtanta. El gida las persunas spezialisadas da valitar en moda structurada in nausch sentiment intern. Interess sveglian er las scolaziuns – saja quai tar instituziuns sco er en il sectur da la famiglia, da la sanadad, da la scola preliminara u da la scola. Il mars 2026 han var 60 persunas frequentà las scolaziuns introductivas. Ulteriuras occurrenzas da Cumpass sco er in event a chaschun dals Dis d'acziun cunter violenza a chasa, il december 2026 a Cuira, èn planisads.

Las experientschas vegnan integradas en il segund onn da pilot
La resonanza positiva mussa che la purschida correspunda als basegns da la pratica. Durant il segund onn da pilot che suonda ussa, vegni mess il focus sin extender sistematicamain la rait e la cussegliaziun posteriura.

La finamira surordinada resta clera: La Cussegliaziun spezialisada per la protecziun d'uffants e l'instrument da lavur «Cumpass» serran ina largia en la protecziun chantunala d'uffants e duain s'etablir duraivlamain sco post da consultaziun fidà e nunbirocratic per persunas spezialisadas e da referiment en il chantun Grischun. La cussegliaziun anonima e gratuita vegn perquai rendida anc pli enconuschenta. Pli baud che svilups disfavuraivels vegnan numnadamain percurschids ed ils pass adattads introducids, e pli baud ch'ils uffants e giuvenils survegnan il sustegn e la protecziun ch'els dovran.

La Cussegliaziun spezialisada per la protecziun d'uffants è cuntanschibla da glindesdi fin venderdi mintgamai da las 8.30 fin las 17.00.

Tel: +41 81 257 65 91
E-mail: cumpass@gr.ch
Web: www.gr.ch/cumpass

Agiuntas:

Flyer «La protecziun d'uffants – ma concerna»
Logo «Cumpass»

Infurmaziuns:

• Cussegl guvernativ Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 13.30 fin las 14.30), e‑mail Marcus.Caduff@dvs.gr.ch
• Susanna Gadient, manadra da l'Uffizi dal servetsch social dal Grischun, tel. +41 81 257 26 51 (cuntanschibla da las 10.30 fin las 11.30), e‑mail Susanna.Gadient@soa.gr.ch

Responsabladad: Uffizi dal servetsch social