Ensemen cun la Regenza grischuna ha il president dal Cussegl dals chantuns Stefan Engler beneventà oz a mezdi las commembras ed ils commembers dal Cussegl dals chantuns en il Grischun per lur viadi d'atun tradiziunal. Sin il program stattan visitas en il Museum d'art dal Grischun e tar Radiotelevisiun Svizra Rumantscha a Cuira sco er in sguard en ils lavuratoris da la Viafier retica a Landquart.
Il viadi tradiziunal dal Cussegl dals chantuns maina mintgamai en il chantun d'origin dal president dal Cussegl dals chantuns en uffizi. En il rom dal viadi da quest onn vegn undrada posteriuramain l'elecziun da Stefan Engler sco president dal Cussegl dals chantuns 2025/2026. Sin giavisch dal president dal Cussegl dals chantuns han ins desistì il december 2025 d'in bainvegni uffizial cun festa d'elecziun (cf. communicaziun a las medias dals 01-12-2025).
Visita en il Museum d'art dal Grischun u tar RTR
Il viadi dal Cussegl dals chantuns ha cumenzà en il Museum d'art dal Grischun a Cuira, ch'è in dals pli attractivs museums da la Svizra. El sa chapescha sco center per art en e dal Grischun cun attracziun internaziunala. Suenter il bainvegni uffizial en il café dal museum han las participantas ed ils participants pudì tscherner tranter ina visita guidada en il Museum d'art ubain ina visita guidada tras la sedia principala da Radiotelevisiun Svizra Rumantscha (RTR). RTR producescha e derasa cuntegns medials en lingua rumantscha per la populaziun da la Svizra.
In sguard davos las culissas da la Viafier retica a Landquart
Pli tard il suentermezdi viageschan ils giasts da Cuira a Landquart, quai en vaguns-salun che vegnan tratgs da la locomotiva legendara «Crocodil» da la Viafier retica. A Landquart visitan las cusseglieras ed ils cussegliers dals chantuns ils lavuratoris da la Viafier retica, nua ch'ellas ed els pon dar in sguard exclusiv davos las culissas dal center d'infrastructura. La Viafier retica collia blers lieus en il Grischun ed è da gronda impurtanza per il traffic public sco er per il turissem.
Cumplettà vegn il viadi dal Cussegl dals chantuns cun ina tschaina en la remisa da locomotivas istorica, che vegn pervia da sia furma radunda enturn la plattafurma da volver er numnada Rotonda. Sco part dal lavuratori principal serva ella per mantegnair e deponer material rullant istoric e modern.
Fotografias agiuntadas:
Fotografias en la mediateca da la Confederaziun
Infurmaziuns:
President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch
Responsabladad: Regenza