La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC) en connex cun ina revisiun planisada da la Lescha federala davart la chatscha e la protecziun dals mamifers e dals utschels selvadis. Il Cussegl federal vul pussibilitar in tractament pli flexibel da lufs problematics e schluccar restricziuns temporalas e territorialas existentas per sajettadas. Quai vul dir: Sche tschertas premissas èn ademplidas, duai esser pussaivel da sajettar lufs da nov er en asils federals da selvaschina. Plinavant duain singuls lufs problematics d'in triep pudair vegnir sajettads er tranter il favrer ed il matg.

Da princip beneventa la Regenza ils plans da sviluppar vinavant il management dal luf. Ord sia vista na va la revisiun proponida dentant betg lunsch avunda. Il management dal luf è vinavant regulà fermamain. En situaziuns da problems acuts è el memia plaun e pretenda blera lavur administrativa. La Regenza spetga perquai, che las basas ch'èn vegnidas elavuradas dals chantuns per il futur management dal luf, vegnian resguardadas il pli tard en il rom da la proxima revisiun annunziada.

La Regenza beneventa, ch'i duai esser permess en l'avegnir da sajettar lufs er entaifer ils asils federals da selvaschina. Ord sia vista è la regulaziun proponida dentant memia restrictiva. Perquai ch'ils territoris d'acziun da lufs e da trieps da lufs surpassan per regla ils cunfins dals asils da selvaschina, duai er esser pussaivel da resguardar donns ordaifer ils asils. Da maniera critica giuditgescha la Regenza plinavant il fatg ch'i duess esser pussaivel da sajettar singuls lufs d'in triep tranter il favrer ed il matg. Durant quest temp pon ils lufs-geniturs esser d'ina impurtanza decisiva per trair si ils pitschens. Cunquai ch'i n'è strusch pussaivel da differenziar en moda segira singuls animals, propona la Regenza in temp da regulaziun unitar che dura dal 1. da zercladur fin ils 28 da favrer.

Consultaziun dal Departament federal per ambient, traffic, energia e communicaziun (DATEC)

Infurmaziuns: Departament d'infrastructura, energia e mobilitad

La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC) en connex cun las revisiuns parzialas da la Lescha da posta e da la Lescha davart l'organisaziun da la Posta. Ella renconuscha il basegn da sviluppar vinavant il provediment postal da basa. Pervia da la digitalisaziun cuntinuanta e pervia dal regress da servetschs postals tradiziunals èsi necessari d'adattar las cundiziuns generalas legalas.

En sia posiziun renda la Regenza attent, che plirs puncts da questas revisiuns giajan dentant memia lunsch ord vista dal chantun Grischun. En spezial na dastgia l'ulteriur svilup necessari dal provediment da basa betg avair per consequenza, che las regiuns muntagnardas e perifericas èn pertutgadas surproporziunalmain da las reducziuns da prestaziuns cumpareglià cun las aglomeraziuns. Per in chantun muntagnard grond cun abitadis decentrals sco il Grischun èsi spezialmain impurtant d'avair in provediment postal da basa fidabel, ch'è bain cuntanschibel ed ha ina qualitad adequata.

Consultaziuns dal Departament federal per ambient, traffic, energia e communicaziun

Infurmaziuns: Departament d'economia publica e fatgs socials

La Regenza ha acceptà la dumonda da la vischnanca da Laax da spustar las raits chantunalas da vias e sendas (rait da sendas da viandar, rait da vias da velos da muntogna, rait da vias tenor il Plan sectorial Velo) sin la nova colliaziun dal traffic plaun tranter Murschetg e Staderas. Plinavant ha ella concedì ina contribuziun chantunala maximala da circa 1,4 milliuns francs.

La vischnanca da Laax ha l'occasiun da cumbinar la construcziun d'in conduct d'aua cun la construcziun d'ina nova colliaziun per peduns e velos tranter Murschetg e Staderas. Empè da manar ils conducts d'ovra tras l'Ual Draus èsi planisà da traversar tal cun ina punt da bischens. La nova punt duai servir a medem temp al traffic plaun, cun la finamira da stgaffir ina colliaziun segira per persunas che van cun mountainbike u a viandar. Plinavant duai la fracziun Murschetg vegnir colliada optimalmain cun il traffic da temp liber. Tut en tut custa il project circa 2,9 milliuns francs.

Infurmaziuns: Departament d'infrastructura, energia e mobilitad

La Regenza ha approvà la revisiun totala da la planisaziun locala, che la vischnanca da Lantsch ha concludì ils 27 d'avust 2024. Il motiv decisiv per la nova planisaziun è stà quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun en il terren cultivà e da diriger il svilup dals abitadis vers anen.

La vischnanca da Lantsch ha examinà ed adattà las zonas da construcziun, e quai areguard lur grondezza, dimensiun ed utilisaziun. Tut en tut ha la vischnanca reducì sia zona d'abitar, maschadada e dal center (ZAMC) per 5310 meters quadrat. Plinavant è l'entir project da planisaziun vegnì accordà cun ils pli novs plans da la mesiraziun funsila e cun las prescripziuns da la digitalisaziun.

© Andrea Badrutt

Infurmaziuns: Departament d'economia publica e fatgs socials

La Regenza ha prendì enconuschientscha dal fatg, ch'ils suandants projects federals vegnan suttamess dumengia, ils 29 da november 2026, a la votaziun dal pievel:

• Conclus federal dals 19 da zercladur 2026 davart la finanziaziun supplementara da la AVS tras in augment da la taglia sin la plivalur (Fegl uffizial federal 2026 1757)
• Iniziativa dal pievel «Per ina limitaziun dals fieus artifizials» (Fegl uffizial federal 2026 1760)
• Iniziativa dal pievel «Gea a taglias federalas gistas er per ils pèrs maridads – Per finalmain metter ina fin a la discriminaziun da la lètg!» (Fegl uffizial federal 2026 1758)
• Midada dals 19 da december 2025 da la Lescha federala davart il material da guerra (LMG) (Fegl uffizial federal 2026 22)

Sin plaun chantunal n'èn previs nagins projects da votaziun.

Infurmaziuns: Chanzlia chantunala