En ils manaschis gastronomics chaschunan las victualias blers custs. Cun il project «Food Save Grischun» èn 25 manaschis gastronomics vegnids accumpagnads durant circa in onn cun la finamira da reducir sistematicamain food waste. Il Food Save Management ha cumbinà la retschertga da datas, analisas individualas dals manaschis, workshops e silsuenter la realisaziun da mesiras concretas. Ussa è il project vegnì terminà cun success.
Al cumenzament dal project han ins eruì la quantitad da food waste da mintga manaschi gastronomic participà. En il rom d'ina segunda perioda da mesiraziun standardisada han ins examinà, tge effect ch'è vegnì cuntanschì cun las mesiras realisadas. Tut ils 25 manaschis han concludì las duas periodas da mesiraziun cun success. Questa gronda participaziun suttastritga l'engaschament dals manaschis. Il food waste total è sa sbassà dad 11 361 kilograms sin 8119 kilograms. Quai correspunda ad ina reducziun da 3242 kilograms resp. da 28,5 pertschient. A medem temp è la media da food waste per giast sa reducida a 47,3 grams.
Ultra da l'effect ecologic han ins er cuntanschì respargns economics. La perdita da rauba è sa reducida per var 23 900 francs, quai che correspunda – sin basa d'in quint integral dals custs – ad in potenzial da spargn da circa 77 800 francs.
Vasta attenziun publica e sensibilisaziun
Il project «Food Save Grischun» n'ha betg mo permess da mesirar in effect entaifer ils manaschis participads, mabain ha er sveglià ina vasta attenziun publica per il tema dal sguaz da victualias. Las medias regiunalas e surregiunalas han rapportà davart singuls resultats dal project e preschentà exempels pratics che han purtà success. Quai ha sensibilisà ulteriurs manaschis per food waste. Grazia a quai èsi stà pussaivel da promover il transfer da savida er ordaifer ils manaschis dal project e da rinforzar en moda persistenta la conscienza per ir enturn plain responsabladad cun victualias.
Schelta d'artitgels publitgads:
Agiunta:
Rapport final «Food Save Grischun»
Infurmaziuns:
Stefan Covanti, partiziun Protecziun tecnica e manaschiala da l'ambient, Gestiun da ruments, Uffizi per la natira e l'ambient, tel. +41 81 257 29 73, e‑mail Stefan.Covanti@anu.gr.ch
Responsabladad: Uffizi per la natira e l'ambient