En ils manaschis gastronomics chaschunan las victualias blers custs. A medem temp procuran las victualias che vegnan producidas, ma betg consumadas per dapli rument ed engrevgeschan uschia l'ambient. Cun il project «Food Save Grischun» porscha l'uniun United Against Waste diversas ideas e metodas per reducir ils ruments da victualias. L'Uffizi per la natira e l'ambient sa participescha finanzialmain a la realisaziun dal project e sustegna ils manaschis gastronomics grischuns en il cumbat cunter il food waste.
Las victualias che vegnan producidas, ma betg consumadas chaschunan dapli rument, emissiuns da dioxid carbonic inutilas, ina perdita da biodiversitad sco er in consum da terren e d'aua. Tenor las indicaziuns da l'Uffizi federal d'ambient (UFAM) vegnan circa 14 pertschient da las grevezzas per l'ambient en Svizra chaschunads da perditas da victualias evitablas tras il sectur da gastronomia. Per quest motiv ha l'uniun United Against Waste (UAW), in'associaziun da la branscha da victualias, sviluppà cun il food save management ina idea a lunga vista per reducir ils ruments da victualias en moda uschè simpla sco pussaivel e per als tegnair bass a lunga vista.
Dal food waste al food save
La finamira principala dal project «Food Save Grischun» èsi d'identifitgar e da realisar potenzials en la gastronomia grischuna per avair resursas effizientas en il sectur da las victualias. Per cumenzar sa participeschan tut ils manaschis gastronomics ad in coaching cumplessiv, mesiran lur ruments da victualias ed han la pussaivladad da sa barattar cun auters manaschis participads. Suenter l'analisa demussa in plan da mesiras, co ch'i pon vegnir evitads ruments ed uschia er spargnads custs. L'experientscha dad UAW mussa, ch'ins pudess reducir ils ruments da victualias en media per 35 pertschient, e quai en moda simpla e persistenta. Per manaschi cumpiglia il project tut en tut duas mesiraziuns entaifer in onn. Il proceder sa basa sin las metodas etablidas dal management da l'ambient cun mesiras concretas che cumpiglian l'analisa, la mesiraziun ed in meglierament permanent. Ina da las finamiras principalas èsi da rinforzar la cumpetenza en il team.
L'hotel Carlton a San Murezzan e l'Ospital chantunal dal Grischun tutgan tar ils manaschis che s'engaschan gia ensemen cun la UAW cunter il sfarlattim da victualias. «Il food save management ans ha en in emprim pass gidà d'analisar noss food waste en l'entir hotel e d'elavurar mesiras sistematicas», declera il directur d'hotel Michael Lehnort. «La mesiraziun respectiva ans ha uschia mussà, che nus avain en general gia in bun nivel e che nus avain anc potenzial da meglierament en il sectur da l'alimentaziun dal persunal sco er tar il consum da paun», resumescha Lehnort las enconuschientschas obtegnidas e renviescha a la collavuraziun en il team: «La preschentaziun dals resultats, il barat e l'elavuraziun da mesiras ensemen cun nossas collavuraturas e noss collavuraturs dal sectur food and beverage èn vegnids stimads fermamain.»
A l'Ospital chantunal dal Grischun vegn Marcel Coray, manader dal sectur hotellaria e servetschs ad ina conclusiun sumeglianta: «En la collavuraziun activa cun la UAW sco cussegliadra spezialisada independenta ed a medem temp partenaria da sparring pretensiusa èsi gartegià da furmar en ils teams la basa per il know-how, ma er per la sensibilitad necessaria per il tema food save. Las collavuraturas ed ils collavuraturs en ils agens teams surpiglian da qua davent ina rolla impurtanta sin l'ulteriura via. La mesiraziun detagliada da la situaziun actuala po vegnir considerada sco term impurtant. Pir las enconuschientschas dals resultats detagliads porschan a nus la pussaivladad d'identifitgar il basegn concret e da deducir da quai mesiras effizientas. L'integraziun da tut ils secturs involvids per lung da process d'alimentaziun è in factur da success essenzial. La chapientscha per la midada dal food waste al food save ha chattà accoglientscha ed ans vegn ad accumpagnar sco team sin la via tschernida.»
Contribuziun a l'Agenda 2030
Cun ina finanziaziun fundamentala porscha l'Uffizi per la natira e l'ambient a 20 manaschis la pussaivladad da participar al project per ina contribuziun als custs primars dal project. La purschida sa drizza tant a la gastronomia individuala sco er collectiva, ad hotels, a centers d'attempads e da tgira, ad instituziuns socialas u ad ospitals. L'ultim termin d'annunzia è ils 31 da matg 2023. Il sustegn da quest project è ina mesira da la planisaziun dals ruments dal chantun ch'è vegnida surlavurada l'onn 2022. Tranter auter ha quella la finamira d'evitar ruments, quai cun promover mesiras adattadas sco sensibilisar ed infurmar la populaziun e las interpresas. En il rom da l'Agenda 2030 è la Svizra s'obligada da smesar ils ruments da victualias fin l'onn 2030.
Beilage und weitere Informationen:
Infurmaziuns:
- Stefan Covanti, partiziun Protecziun da l'ambient tecnic e manaschial, Gestiun da ruments, tel. +41 81 257 29 73, e‑mail Stefan.Covanti@anu.gr.ch
- Alexander Pabst, United Against WaUnited Against Waste, c/o Foodways Consulting ScRL, e‑mail Alexander.Pabst@foodways.ch
Responsabladad: Uffizi per la natira e l'ambient