Per il 1. da schaner 2023 augmenta la Regenza ils supplements da famiglia. Ultra da quai garantescha ella a la Viafier retica la cuvrida dal deficit da l'onn 2021 pervia da COVID-19 e determinescha ulteriuras zonas da paus per la selvaschina en la vischnanca da Scuol.
Ils supplements da famiglia vegnan augmentads
La Regenza ha approvà la revisiun parziala da
las disposiziuns executivas tar la Lescha davart ils supplements da famiglia.
L'ordinaziun duai entrar en vigur il 1. da schaner 2023. Cun la revisiun
parziala qua avant maun duain vegnir distgargiadas tant las famiglias sco er
las interpresas che fan giu quint cun la cassa da cumpensaziun chantunala per
famiglias.
Cun l'adattaziun duain vegnir augmentads ils
supplements d'uffants e da scolaziun per mintgamai 10 francs per mais e per
uffant. A medem temp duai vegnir sbassada la tariffa da contribuziun per ils
patruns, per las persunas cun gudogn independent e per las persunas impiegadas
cun patruns senza obligaziun da pajar contribuziuns, quai dad 1,65 pertschient
ad 1,60 pertschient da la summa dals salaris ch'è suttamessa a la AVS.
La Regenza ha approvà la revisiun parziala da las disposiziuns executivas tar la Lescha davart ils supplements da famiglia. L'ordinaziun duai entrar en vigur il 1. da schaner 2023.
Il deficit da la Viafier retica ch'è resultà pervia da COVID-19 vegn cuvert
Il chantun surpiglia 20 pertschient, pia 3,09 milliuns francs dal deficit che la Viafier retica ha fatg l'onn passà pervia da
COVID-19. En il sectur dal traffic regiunal da persunas preschenta la Viafier
retica en total in deficit da circa 15,45 milliuns francs en connex cun
COVID-19. Areguard la cuvrida dal deficit dal chantun resti resalvà, che la
Confederaziun surpiglia sia cumpart dad 80 pertschient dal deficit, pia var
12,36 milliuns francs.
La Regenza satisfa uschia ad ina dumonda da la
Viafier retica, la quala ha en mira las prestaziuns dal traffic regiunal da
persunas che la Confederaziun ed ils chantuns han empustà communablamain l'onn 2021. La finanziaziun da la contribuziun chantunala è gia vegnida garantida
l'onn da gestiun 2022 tras in credit posteriur.
© Rhätische Bahn / Andrea Badrutt
Il chantun surpiglia 20 pertschient, pia 3,09 milliuns francs dal deficit che la Viafier retica ha fatg l'onn passà pervia da COVID-19.
Il rapport «Planisaziun dals ruments dal Grischun 2022» è approvà
La Regenza ha prendì enconuschientscha dal
rapport «Planisaziun dals ruments dal Grischun 2022» dals 31 d'avust 2022 ed ha
approvà la planisaziun dals ruments e las mesiras dumandadas.
Sin basa da la Lescha
federala davart la protecziun da l'ambient e da l'Ordinaziun davart la
prevenziun e l'allontanament da rument èn ils chantuns obligads da far ina
planisaziun dals ruments, da controllar quella mintga 5 onns e da l'actualisar
en cas da basegn. L'ultima revisiun da la Planisaziun grischuna dals ruments è
vegnida fatga l'onn 2016. La finamira dal rapport «Planisaziun dals ruments dal
Grischun 2022» – elavurà per incumbensa da l'Uffizi per la natira e l'ambient –
è quella da preschentar il stadi da la gestiun dals ruments en il Grischun e da
mussar uschè blers svilups sco pussaivel cun consequenzas previsiblas u midadas
che spetgan. En la revisiun han ins da nov er resguardà temas actuals sco la
protecziun dal clima, il recycling da plastic ed il foodwaste. Il rapport da la
planisaziun dals ruments cuntegna in plan da mesiras cun tut en tut 29 mesiras
per ils secturs da ruments «ruments chasans combustibels», «materias da valur»,
«ruments verds», «ruments/tschendras da laina», «ruments da construcziun
minerals», «deponias» e «clima».
La Regenza ha prendì enconuschientscha dal rapport «Planisaziun dals ruments dal Grischun 2022» dals 31 d'avust 2022 ed ha approvà la planisaziun dals ruments e las mesiras dumandadas.
Determinà ulteriuras zonas da paus per la selvaschina en la vischnanca da Scuol
La Regenza ha approvà la revisiun parziala da
la planisaziun locala concludida da la vischnanca da Scuol ils 13 da favrer 2022. Uschia duain vegnir unifitgadas las disposiziuns da la Lescha da
construcziun concernent las zonas da paus per la selvaschina da las anteriuras
vischnancas dad Ardez, Guarda, Ftan, Scuol e Sent, ch'èn oz fracziuns da
l'entira vischnanca da Scuol.
Durant ils mais d'enviern vegn la Val S-charl
visitada d'adina dapli sportists d'enviern – cun skis, snowboard u gianellas –
che na resguardan betg las rutas usitadas tenor las cartas da tura. Qua tras
vegn la selvaschina disturbada adina pli savens en ils quartiers d'enviern
impurtants. Perquai ch'ins ha fatg bunas experientschas cun las zonas da paus
per la selvaschina existentas en la Val S-charl, duain tals territoris vegnir
determinads er en il God da Praditschöl ed en il God da Tamangur. Ultra da quai
duain las zonas da paus per la selvaschina da fin ussa en ils territoris Peidra
Pignan e La Tulaida / Clüs / Chanouva ad Ardez vegnir determinadas da nov tenor
la disposiziun unifitgada da la Lescha da construcziun concernent las zonas da
paus per la selvaschina. Sur Ardez èsi plinavant planisà da transferir la senda
da chaminar e da viandar sin la via forestala existenta. La part sut da la
senda da viandar existenta vegn persuenter abolida.
© swisstopo
La Regenza ha approvà la revisiun parziala da la planisaziun locala concludida da la vischnanca da Scuol ils 13 da favrer 2022. Uschia duain vegnir unifitgadas las disposiziuns da la Lescha da construcziun concernent las zonas da paus per la selvaschina da las anteriuras vischnancas dad Ardez, Guarda, Ftan, Scuol e Sent, ch'èn oz fracziuns da l'entira vischnanca da Scuol.
Novas surfatschas da mastergn en la vischnanca da Schlarigna
La Regenza ha approvà la revisiun parziala da
la planisaziun locala che la vischnanca da Schlarigna aveva concludì ils 14 da december 2020. Uschia stgaffescha ella las premissas da la planisaziun dal
territori per domiciliar interpresas da mastergn regiunalas en il territori
«Pros d'Islas».
Per il
mastergn local n'existan naginas reservas da surfatschas da mastergn en la vischnanca
da Schlarigna, quai cun excepziun da la zona d'abitar e da mastergn «F» sper la
staziun da val dal runal. Questa zona è però reservada primarmain per novs
manaschis d'hotel. Cun questa revisiun parziala po d'ina vart vegnir cuvrì il
basegn dals manaschis locals per ulteriuras surfatschas da mastergn e da
l'autra vart pon vegnir domiciliads novs manaschis. Previs èsi da domiciliar
interpresas da servetschs e da mastergn che chaschunan pauc traffic e paucas
emissiuns.
© Andrea Badrutt
La Regenza ha approvà la revisiun parziala da la planisaziun locala che la vischnanca da Schlarigna aveva concludì ils 14 da december 2020.
Projects da votaziun dals 27 da november 2022
La Regenza ha prendì enconuschientscha dal
fatg, ch'i na vegnan suttamess nagins projects federals a la votaziun dal
pievel la dumengia dals 27 da november 2022.
Sin plaun chantunal vegni votà davart las suandantas duas fatschentas:
- revisiun parziala da la
Constituziun chantunala (Refurma da las dretgiras3);
- credit d'impegn per la renovaziun
e l'engrondiment da l'Edifizi chantunal a Cuira.
La Regenza ha prendì enconuschientscha dal fatg, ch'i na vegnan suttamess nagins projects federals a la votaziun dal pievel la dumengia dals 27 da november 2022.
