La Regenza grischuna ha elegì Reto Müller sco nov cusseglier da banca per la Banca Chantunala Grischuna. El entra en uffizi il 1. da fanadur 2027. Plinavant ha la Regenza prolungà il mandat da la cussegliera da banca Michèle F. Sutter-Rüdisser per ulteriurs 4 onns ed elegì ella sco vicepresidenta dal cussegl da banca.
La Regenza ha l'incumbensa d'eleger il cussegl da banca da la Banca Chantunala Grischuna (BCG) che sa cumpona da set persunas. Ella ha elegì Reto Müller sco nov commember per la perioda d'uffizi dals 1. da fanadur 2027 fin ils 30 da zercladur 2031. La BCG ha dumandà l'Autoritad federala per la surveglianza dals martgads da finanzas FINMA d'approvar l'elecziun tenor il dretg da surveglianza.
Reto Müller ha blers onns experientscha en l'industria da finanzas. Durant passa 30 onns ha el lavurà en differentas funcziuns directivas da la Credit Suisse e da la UBS. Tranter auter è el stà durant in pli lung temp commember dal cussegl d'administraziun da la BANK-now SA, sco er durant bunamain 8 onns manader da la regiun da la Svizra Orientala. En quella rolla ha el er manà il Private Banking. En il rom da questa lavur era el oravant tut er responsabel per il chantun Grischun e tgirava in barat regular cun l'economia, la politica, las medias e la clientella impurtanta. Fin il schaner 2026 è Reto Müller stà il chief risk officer da la UBS Switzerland SA sco er commember da la direcziun da la banca.
Reto Müller suonda a Christoph Caviezel che banduna il cussegl da banca suenter trais periodas d'uffizi pervia da la limitaziun dal temp d'uffizi. La Regenza engrazia gia ussa a Christoph Caviezel per sia activitad preziusa e prosperaivla durant blers onns sco commember e vicepresident dal cussegl da banca da la Banca Chantunala Grischuna.
La Regenza ha elegì ina nova vicepresidenta
Per il vicepresidi da la BCG che sto vegnir occupà da nov, ha la Regenza elegì Michèle F. Sutter-Rüdisser. A medem temp ha ella prolungà ses mandat en il cussegl da banca per 4 ulteriurs onns. Michèle F. Sutter-Rüdisser è dapi il 2021 commembra dal Cussegl da banca. Ella è professuressa d'economia a la School of Management da l'Universitad da Son Gagl ed è engaschada en differents cussegls administrativs.
Fotografias agiuntadas:
Reto Müller ©Banca Chantunala Grischuna
Michèle F. Sutter-Rüdisser ©Banca Chantunala Grischuna
Infurmaziuns:
President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch
Responsabladad: Regenza