La Regenza ha declerà Christian Rathgeb sco cusseglier naziunal elegì per ils 30 da november 2026, quai sco substituziun per la cussegliera naziunala Anna Giacometti che sa retira anticipadamain.

Tenor la Lescha federala davart ils dretgs politics sto la regenza chantunala declerar l'emprim suppleant da la medema glista sco elegì, sch'ina commembra u in commember dal Cussegl naziunal sa retira avant la fin da sia perioda d'uffizi. A chaschun da las ultimas elecziuns dal Cussegl naziunal dals 22 d'october 2023 aveva la cussegliera naziunala Anna Giacometti candidà sin la glista «PLD-l'emprima». Sco emprim suppleant per la cussegliera naziunala ch'è sa retratga per ils 29 da november 2026, suonda Christian Rathgeb che vegn a surpigliar l'uffizi respectiv per il temp restant.

La Regenza ha approvà la revisiun parziala da la planisaziun locala che la vischnanca da Flem aveva concludì ils 5 da favrer 2025. Il motiv decisiv per la nova planisaziun è stà quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun en il terren cultivà e da diriger il svilup dals abitadis vers anen.

La vischnanca da Flem ha examinà ed adattà las zonas da construcziun, e quai areguard lur grondezza, dimensiun ed utilisaziun. Tut en tut ha la vischnanca reducì sia zona d'abitar, maschadada e dal center (ZAMC) per circa 154 245 meters quadrat. Plinavant èn vegnidas determinadas differentas mesiras per promover il svilup da l'abitadi vers anen, sco l'augment moderà dals grads d'utilisaziun admissibels, la garanzia da spessezzas minimalas e mesiras intenziunadas per las planisaziuns consecutivas. Per las zonas da construcziun existentas è vegnida fixada in'obligaziun da construcziun cun termins da 5 fin 8 onns. En quest connex èsi vegnì desistì per gronda part da mesiras per mobilisar terren da construcziun per surfatschas d'iert e dal conturn existentas. Plinavant vegn il plan d'utilisaziun adattà als basegns ed al svilup dal territori prendì en mira tenor la «Strategia territoriala per il futur Flem». La finala è l'entir project da planisaziun vegnì accordà cun las pli novas basas da la mesiraziun uffiziala e cun las prescripziuns da la digitalisaziun.