Co pon interpresas tegnair a lunga vista forzas spezialisadas? L'occurrenza publica online «Appartegnientscha fa effect.» dals 10 da november 2026 mussa, co che appartegnientscha, direcziun inclusiva, pussaivladads da svilup e raits internas gidan a liar talents. Interpresas e persunas interessadas dals chantuns Grischun e Son Gagl survegnan impuls che sa basan sin la scienza, exempels concrets da la pratica e temp per in barat d'experientschas.
Igl è difficil da chattar forzas spezialisadas – e savens anc pli pretensius da las tegnair a lunga vista. Gist interpresas da la branscha da tecnologia e dad IT investeschan bler per recrutar e scolar collavuraturas e collavuraturs qualifitgads. Tant pli gronda è la sfida, sch'ils talents bandunan suenter curt temp puspè l'interpresa. In ferm sentiment d'appartegnientscha po esser in agid decisiv, per che collavuraturas e collavuraturs restian en l'interpresa ed en la branscha.
L'occurrenza unescha interpresas e persunas interessadas dal spazi economic Grischun e Son Gagl. En il center stat in input fundà scientificamain sco er invistas praticas e propostas da soluziun concretas. Organisada vegn l'occurrenza da la rait Diversity-gr, che cumpiglia tranter auter il Post da stab per l'egualitad da las schanzas per dunnas ed umens sco er la partiziun Integraziun ed egualitad dal chantun Son Gagl.
Keynote e tschintg workshops pratics
Priska Burkard, co-founder e managing director da TechFace sco er co-autura da «Der Code der Zugehörigkeit», explitga en ses referat d'input sut il titel «Wer bleibt eigentlich? Diverse Talente in der Tech-Branche halten», pertge che collavuraturas e collavuraturs bandunan ina interpresa e tge signals d'avertiment che las persunas da cader survesan. En il focus stattan appartegnientscha, direcziun inclusiva, vias da carriera e flexibilitad.
Las participantas ed ils participants approfundeschan suenter il tema en duas rundas cun tschintg breakout sessions. Interpresas ed organisaziuns sco la Bühler SA, Abraxas Informatik SA ed xCulture contribueschan experientschas concretas da la pratica. Las sessions tractan ils temas: liar las dunnas a lunga vista en la branscha da tecnologia, moda da manar sco clav cunter la mancanza da forzas spezialisadas, mentoring sco instrument per appartegnientscha, strategias da diversity che sa basan sin datas sco er l'impurtanza da sustegnair e d'avair il curaschi da crescher professiunalmain.
Occurrenza online dals 10 da november 2026
«Appartegnientscha fa effect. Vias praticas per liar cun success talents» ha lieu mardi, ils 10 da november 2026, da las 16.00 fin las 18.00, e quai online via Zoom. L'occurrenza è gratuita. Ulteriuras infurmaziuns ed annunzia sut www.diversity-gr.ch.
Diversity-gr – rait per egualitad e diversitad en il Grischun
Il basegn da forzas spezialisadas en il Grischun è grond, en spezial tar las firmas da tecnologia. Questas interpresas èn conscientas, ch'ellas han ina mancanza da forzas da lavur e da cader femininas e vulan midar quai. Diversity-gr, ina rait per interpresas en il Grischun, s'engascha per egualitad e diversitad e sensibilisescha per ils connexs. La rait porscha ad interpresas ina plattafurma per il barat d'experientschas, quai per chattar soluziuns pussaivlas per la cumpatibilitad da la professiun, la famiglia ed il temp liber e per promover ina cultura d'interpresa ch'è averta per diversitad.
«Cun Diversity-gr vulain nus dar impuls concrets ad interpresas en il Grischun, co ch'ellas pon tegnair e promover a lunga vista forzas spezialisadas – cunzunt dunnas», accentuescha Barbara Wülser, manadra dal Post da stab per l'egualitad da las schanzas. «Las experientschas da la pratica mussan: Tgi che prenda serius l'appartegnientscha, obtegna collavuraturas e collavuraturs engaschads e loials.»
Infurmaziuns:
Barbara Wülser, manadra dal Post da stab per l'egualitad da las schanzas per dunnas ed umens, tel. +41 81 257 35 71 (cuntanschibla da las 8.30 fin las10.30 e da las 15.00 fin las 17.00), e‑mail Barbara.Wuelser@stagl.gr.ch
Responsabladad: Post da stab per l'egualitad da las schanzas per dunnas ed umens