La chatscha auta grischuna 2026 è stada caracterisada da temperaturas extraordinariamain chaudas e per gronda part da bell'aura. Quai è sa mussà particularmain tar la preda da tschiervs ch'è stada pli pitschna ch'ils onns avant. Entant che la preda da chamutschs è stada buna, èn vegnids sajettads var 160 chavriels damain che l'onn avant. Per ademplir ils plans da prelevaziun regiunals da tschiervs e da chavriels, ha lieu il november ed il december ina chatscha speziala en 21 regiuns.
Las relaziuns da la chatscha 2026 èn stadas favuraivlas per la chatscha da chamutschs, entant che las temperaturas chaudas han difficultà la chatscha da tschiervs. Cun 2903 tschiervs sajettads è la preda stada pli pitschna che l'onn avant. La diminuziun è cunzunt d'attribuir al fatg, ch'igl è vegnì sajettà in dumber pli pitschen d'animals masculins; la preda da las vatgas-tschierv è stada mo levamain pli pitschna che l'onn avant. La preda da chavriels ha cuntanschì cun 2339 animals la media da blers onns. Tar ils chamutschs èn vegnids sajettads 3053 animals, quai ch'è ina buna preda. En la Mesolcina èn plinavant vegnids sajettads 22 portgs selvadis.
Resultats da l'emprima part da la chatscha grischuna 2026:
La chatscha speziala è impurtanta
«La chatscha dal november e dal december è impurtanta per ademplir ils plans da prelevaziun dals animals feminins e per adattar il dumber da tschiervs e da chavriels als quartiers d'enviern», di Lukas Walser, manader da la partiziun Selvaschina e chatscha tar l'Uffizi da chatscha e pestga. Impurtant è quai er per mantegnair a lunga vista guauds da protecziun sauns e bain structurads. Per ademplir ils plans da prelevaziun sco er l'incumbensa da chatscha vegn la chatscha speziala 2026 permessa per 1637 vatgas-tschierv e lur vadels, per 241 chavriels ed – entaifer quatter territoris problematics pertutgant il guaud e la selvaschina – per 12 chamutschs. Tar ils tschiervs è il plan da la chatscha speziala 2026 levamain pli bass che l'onn avant. Cun 241 chauras ed ansiels è il plan da chatscha speziala er tar ils chavriels pli bass che l'onn avant. Sco ils onns precedents vegn la chatscha speziala sin portgs selvadis permessa senza limitar il dumber, perquai che lur populaziuns creschan e perquai che quests animals fan pli e pli gronds donns en l'agricultura.
Ina lavur pretensiusa spetga
La chatscha speziala dal november e december è fitg pretensiusa per las chatschadras ed ils chatschaders. En bleras regiuns s'engaschan els vinavant fitg per cuntanscher las finamiras dal svilup da las populaziuns, ch'èn vegnidas definidas en il rom da la strategia da la Regenza «Spazi da viver guaud-selvaschina 2021». En vista a las populaziuns da selvaschina, ch'èn en blers lieus gia regressivas, daventa questa incumbensa pli e pli pretensiusa. La regulaziun da las populaziuns da selvaschina duai vegnir ademplida cun grond respect envers la selvaschina e la natira. Las chatschadras ed ils chatschaders dovran per quai il sustegn da tut las persunas participadas – en spezial er da las proprietarias e dals proprietaris da guaud.
Agiuntas:
Infurmaziuns:
- Lukas Walser, manader da la partiziun Selvaschina e chatscha, Uffizi da chatscha e pestgai, tel. +41 81 257 38 92 (cuntanschibel da las 10.30 fin las 11.30), e‑mail Lukas.Walser@ajf.gr.ch
- Urban Maissen, selvicultur chantunal, Uffizi da guaud e privels da la natira, tel. +41 79 475 52 11, e‑mail Urban.Maissen@awn.gr.ch
Responsabladad: Uffizi da chatscha e pestga