La Regenza ha approvà il project «Protecziun cunter bovas Rià de Righina» da la vischnanca da Buseno. La Confederaziun ed il chantun sa participeschan al project cun maximalmain 243 200 francs en il rom da la Cunvegna da program da la nova gulivaziun da finanzas (NGF) en il sectur «Privels da la natira gravitativs tenor la Lescha dal guaud 2025–2028». Ils custs totals vegnan budgetads cun 380 000 francs.

Il territori dal project è da la vart dretga da la Val Calanca en la vischnanca da Buseno. L'onn 2017 è vegnida elavurada per Buseno ina nova charta da privels Aua. En quest connex èsi sa mussà, che plirs edifizis sut la storta stretga da la Via Premoret èn periclitads per part considerablamain tras bovas. Sur quests edifizis datti gia in pitschen batschigl da retenziun cun in volumen da 25 meters cubic, ch'è dentant insuffizient per retegnair bovas. Il project actual prevesa da construir in ulteriur batschigl per retegnair glera cun ina capacitad da 250 meters cubic. Il nov batschigl da retenziun vegn collià sur in chanal da betun cun il batschigl existent. Cumplementarmain èn previs in mir da sustegn ed ina via d'access per il mantegniment e per la svidada.

Infurmaziuns: Departament d'infrastructura, energia e mobilitad

La Regenza ha approvà il concept detaglià dal program da promoziun «Giuvens Talents Musica» e la realisaziun dal program a partir dal 2027. Per quest intent ha ella concedì per ils onns 2027 e 2028 ina nova expensa da 494 750 francs tar contribuziuns federalas da 185 400 francs ed ina grevezza netta dal chantun da 309 350 francs. Resalvada resta la concessiun dals credits respectivs necessaris tras il Cussegl grond e la Confederaziun.

La finamira da la promoziun da talents giuvens è d'identifitgar a temp uffants e giuvenils dal chantun Grischun che han talents musicals extraordinaris, d'als colliar in cun l'auter e d'als promover sistematicamain e persistentamain sin basa da lur nivel e da lur basegns individuals. La purschida sa drizza a tut ils uffants e giuvenils tranter 4 e 24 onns ch'èn domiciliads en il chantun. Ella è stilisticamain averta e sustegna ultra da quai ils talents a sa preparar per in eventual examen d'admissiun ad ina scol'auta svizra da musica.

Infurmaziuns: Departament da furmaziun, ambient e cultura

Sin basa dal rendaquint definitiv per l'onn 2025 ha la Regenza concedì contribuziuns da gulivaziun da totalmain var 885 000 francs a tut en tut otg cassas da cumpensaziun per famiglias. La gulivaziun da las grevezzas per las cassas privatas da cumpensaziun per famiglias correspunda da princip ad in sistem da repartiziun annual. Las finamiras èn in quint equilibrà ed ina reserva adequata dal fond.

Per otg cassas da cumpensaziun per famiglias (l'onn avant: 15) han ils rendaquints per l'onn precedent mussà custs imputabels pli gronds che retgavs imputabels. Otg cassas da cumpensaziun per famiglias han pia il dretg da survegnir ina contribuziun da gulivaziun per l'onn 2025.

Infurmaziuns: Departament d'economia publica e fatgs socials

La Regenza ha concludì da metter en vigur per il 1. da schaner 2027 la revisiun parziala da la Lescha davart la gulivaziun da finanzas en il chantun Grischun (Lescha davart la gulivaziun da finanzas), ch'il Cussegl grond aveva concludì en la sessiun da zercladur 2026. Plinavant ha ella approvà la revisiun parziala da l'Ordinaziun davart la gulivaziun da finanzas e concludì da metter en vigur quella medemamain per il 1. da schaner 2027.

Ultra d'intginas rectificaziuns formalas cuntegnan las revisiuns parzialas adattaziuns da tscherts puncts da la gulivaziun da las grevezzas geografic-topograficas e da scola (GGG), da la gulivaziun individuala d'inegualitads per grevezzas spezialas (GIG) sco er da las dimensiuns legalas per la dotaziun da la GGG e per l'apport da meds publics generals en la finanziaziun speziala Gulivaziun da finanzas per vischnancas.

Infurmaziuns: Departament da finanzas e vischnancas