Il chantun Grischun regla il sustegn finanzial per persunas cun status da protecziun S a partir dal mars 2027. Cun adattar la Lescha davart il sustegn da persunas basegnusas (LS) duain las Ucranaisas ed ils Ucranais fugids survegnir il medem sustegn sco durant ils emprims 5 onns da lur dimora en il Grischun. La Regenza ha deliberà la missiva per mauns dal Cussegl grond per la tractar en la sessiun da december 2026.
Il mars 2027 vegnan las emprimas fugitivas ed ils emprims fugitivs da l'Ucraina a viver dapi 5 onns en Svizra. Quai ha consequenzas per lur status da dimora e per l'agid social: Ellas ed els han il dretg d'ina permissiun da dimora B ed uschia da princip da las medemas prestaziuns d'agid social sco la populaziun indigena.
Parallelamain reducescha la Confederaziun – en il rom dal pachet da distgargia 2027 – sia participaziun finanziala als custs da l'agid social en il sectur d'asil. Ils custs supplementars ston ils chantuns e las vischnancas surpigliar.
Tractament egual per tuttas e tuts – independentamain dal status da dimora
La Regenza vul tractar tut las persunas cun status da protecziun S en moda eguala. «Persunas cun ina permissiun da dimora duain survegnir il medem sustegn finanzial sco persunas senza permissiun da dimora», declera il cusseglier guvernativ Marcus Caduff, schef dal Departament d'economia publica e fatgs socials. Per persunas cun status da protecziun S en il Grischun vul quai dir: A partir dal mars 2027 survegnan ellas il medem sustegn sco durant ils emprims 5 onns. Quel correspunda a las Directivas da la Conferenza svizra da l'agid social (COSAS). Ma il basegn fundamental vegn fixà 20 pertschient pli bass.
Per quest intent sto vegnir adattada la lescha. Senza questa adattaziun avessan las emprimas persunas cun status da protecziun S a partir dal mars 2027 il dretg da survegnir agid social en la medema dimensiun sco la populaziun indigena.
Revisiun parziala sur la missiva dal preventiv
Per che las directivas legalas possian entrar en vigur il 1. da mars 2027, vegni desistì da far ina consultaziun ordinaria. La revisiun parziala da la Lescha davart il sustegn da persunas basegnusas (LS) vegn fatga en il rom da la missiva dal preventiv. Il Cussegl grond tracta questa fatschenta durant la sessiun da december 2026.
Agiunta:
Missiva dal preventiv 2027 (davent da p. 61: revisiun parziala da la Lescha davart il sustegn da persunas basegnusas)
Infurmaziuns:
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 13.00 fin las 13.30), e‑mail Marcus.Caduff@dvs.gr.ch
Responsabladad: Regenza