Il president da la Regenza Martin Bühler è s'inscuntrà cun Daniela Stoffel, secretaria da stadi per dumondas finanzialas internaziunalas, sco er cun represchentantas e represchentants da las regiuns da cunfin, per discutar davart la Cunvegna da cunfinarias e cunfinaris tranter la Svizra e l'Italia. Centralas èn stadas las consequenzas da la cunvegna per il chantun e per las regiuns da cunfin.

Glindesdi passà ha gì lieu a Cuira in inscunter davart la Cunvegna da cunfinarias e cunfinaris tranter la Svizra e l'Italia. Il president da la Regenza Martin Bühler ha retschavì Daniela Stoffel, secretaria da stadi per dumondas finanzialas internaziunalas. A l'inscunter eran participadas er represchentantas e represchentants dal chantun Grischun, da las regiuns da cunfin e dal Secretariat da stadi per dumondas finanzialas internaziunalas (SFI).

L'inscunter ha permess da tematisar las experientschas ed ils giavischs da las regiuns sco er da discutar davart las consequenzas da la Cunvegna da cunfinarias e cunfinaris, che vegn applitgada dapi il 2024, per il chantun Grischun e per las regiuns da cunfin pertutgadas. Las represchentantas ed ils represchentants dal chantun e da las vischnancas han pudì mussar las particularitads da las regiuns da cunfin dal Grischun e render visibel l'impurtanza da las cunfinarias e dals cunfinaris. Cunzunt en l'Engiadina ed en las Vals dal Sid dal Grischun è la dependenza da cunfinarias e cunfinaris talians gronda.

Ils giavischs centrals dal chantun han pudì vegnir deponids directamain tar la Confederaziun. E quella ha pudì vegnir sensibilisada pli fitg per ils basegns e las sfidas particularas dal Grischun.

Fotografia:

Da sanestra a dretga: Deputà Maurizio Michael, Giulia Giovanoli (vischnanca da Bregaglia), Angelo Roberto (schef Administraziun da taglia), president da la Regenza Martin Bühler, secretaria da stadi Daniela Stoffel, Valentino Rosselli (SFI), Luzius Stricker (Uffizi per economia e turissem), Mascha Roth (SFI), Michael Rupp (Administraziun da taglia)

Infurmaziuns:

President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch

Responsabladad: Departament da finanzas e vischnancas