Il Program chantunal d'integraziun (PCI 4) 2028–2032 cumplettescha las mesiras d'integraziun vertentas cumprovadas cun dus novs puncts centrals tematics: «lavur grazia a furmaziun» ed «integraziun da dunnas en il martgà da lavur». Il program duai vegnir elavurà cun la participaziun e la cooperaziun da la societad civila.
La differenza tranter las quotas d'activitad da gudogn dad umens e dunnas è en general pli gronda tar fugitivas e fugitivs che tar Svizras e Svizzers. Pervia da quai dovri mesiras per meglierar l'access da las dunnas al martgà da lavur. Areguard la cumbinaziun da lavur parziala e tgira d'uffants vesa il Post spezialisà per l'integraziun anc potenzial.
Plazzas parzialas, per exempel en il turissem u en il sectur da sanadad, pretendan savens ina gronda flexibilitad tar ils temps da lavur. Sche la tgira d'uffants manca, na vegnan ellas strusch en dumonda per mammas. «Co reusseschi a dunnas da far il pass en il mund da lavur, er sch'ellas n'han betg tattas e tats u ina persuna ordaifer la famiglia che tgiran ils uffants? A talas dumondas tschertgain nus respostas cun il PCI 4», di Felix Birchler, manader dal Post spezialisà per l'integraziun.
Co pon ins sa participar?
«Per che l'integraziun possia reussir, dovri l'engaschament da las fugitivas e dals fugitivs, da las persunas immigradas sco er da nus tuttas e tuts», di il cusseglier guvernativ Peter Peyer, schef dal Departament da giustia, segirezza e sanadad. Per il PCI 4 lantscha il Post spezialisà per l'integraziun perquai in process participativ per sviluppar ideas e mesiras innovativas en ils novs puncts centrals tematics. En il barat cun la societad civila, las uniuns da migrantas e migrants, las organisaziuns dal mund da lavur, las vischnancas, ils posts da servetsch cumpetents e tut ils ulteriurs circuls interessads vegnan definidas las basas per la lavur d'integraziun futura.
Tgi che vul sa participar a l'elavuraziun da la politica chantunala d'integraziun, po annunziar ses interess fin ils 15 da december 2026 per e-mail a kip4@afm.gr.ch. A la medema adressa pon er vegnir inoltradas fin lura propostas tematicas concretas per projects d'integraziun, ideas, opiniuns e visiuns per sviluppar vinavant la promoziun chantunala da l'integraziun.
Ils programs chantunals d'integraziun èn sa cumprovads dapi l'onn 2014 sco instrument central da la promoziun da l'integraziun. Els pussibiliteschan ina promoziun coordinada che correspunda als basegns, en spezial en ils secturs da la lingua, da la furmaziun e dal martgà da lavur. Las basas per ils programs d'integraziun vegnan definidas cuminaivlamain da la Confederaziun e dals chantuns e cumpiglian ils suandants secturs da promoziun:
- Infurmaziun, scleriment dal basegn d'integraziun e cussegliaziun
- Lingua
- Cumpetitivitad en la scolaziun e sin il martgà da lavur
- Uffanza tempriva
- Convivenza e participaziun
- Ir enturn cun diversitad e protecziun cunter discriminaziun
- Interpretaziun / translaziun
En il PCI 4 duain vegnir integrads dus novs accents supplementars:
- Ils obstachels per l'integraziun da dunnas duain vegnir eliminads sistematicamain
- Las vias da furmaziun duain vegnir tratgas a niz anc meglier per ina integraziun persistenta en il martgà da lavur
Ulteriuras infurmaziuns / agiuntas:
Tgi che vul sa participar a l'elavuraziun da la politica chantunala d'integraziun, po annunziar ses interess fin ils 15 da december 2026 per e-mail a kip4@afm.gr.ch.
Explicaziuns davart ils secturs da promoziun sco er davart las finamiras d'integraziun da la Confederaziun chattan ins sin la pagina d'internet da la Confederaziun: Programs chantunals d'integraziun 2028–2032 (PCI 4)
Infurmaziuns:
Felix Birchler, Uffizi da migraziun e da dretg civil, manader dal Post spezialisà per l'integraziun / incumbensà chantunal d'integraziun, tel. +41 81 257 36 84 (cuntanschibel da las 08.30 fin las 09.45 e da las 13.00 fin las 15.00), e‑mail Felix.Birchler@afm.gr.ch
Responsabladad: Uffizi da migraziun e da dretg civil / Post spezialisà per l'integraziun