Navigation

Inhaltsbereich

  • Erste Mitteilung
  • Neuen Beitrag einfügen

Las Grischunas ed ils Grischuns fan uschè bler sport sco anc mai: Quatter da tschintg persunas fan almain ina giada per emna sport. Sch'i va per l'activitad sportiva, è il Grischun pia cleramain sur la media svizra. Cunzunt las persunas tranter 15 e 29 onns fan ussa cleramain dapli sport. Quai mussa il nov studi «Sport en il Grischun 2026» ch'è vegnì preschentà oz dal cusseglier guvernativ Jon Domenic Parolini e da dr. phil. Markus Lamprecht da l'Observatori svizzer da sport.

Il studi «Sport en il Grischun 2026» fa part da la retschertga naziunala «Sport Svizra 2026» ed è vegnì realisà gia per la quarta giada en il chantun Grischun suenter il 2008, 2014 e 2020. Interrogà han ins ina gruppa represchentativa da Grischunas e Grischuns a partir da 15 onns. Il studi furnescha basas impurtantas per sviluppar vinavant la promoziun chantunala dal sport. Ils resultats mussan che l'activitad sportiva da la populaziun grischuna è s'augmentada anc ina giada cleramain ils ultims 6 onns e ch'il dumber da persunas che na fan betg sport è sa reducì sin in nivel bass. Quatter da tschintg Grischunas e Grischuns fan almain ina giada per emna sport e passa la mesadad tutga tar las sportistas ed ils sportists fitg activs che fan pliras giadas per emna sport durant almain trais uras en tut. Il Grischun è uschia pia cleramain sur la media svizra.

Promover il sport a lunga vista fa effect
Per il cusseglier guvernativ Jon Domenic Parolini, schef dal Departament da furmaziun, ambient e cultura, èsi cunzunt legraivel da vesair il svilup da las persunas tranter 15 e 29 onns. Questa gruppa da vegliadetgna fa ussa cleramain dapli sport. Ils resultats demussan che las investiziuns a lunga vista en la promoziun dal sport sco er il sustegn d'uniuns, da scolas e da vischnancas fan effect. «Ch'il Grischun fa oz in'uschè buna figura, n'è betg casualitad. Ils resultats legraivels resultan d'ina promoziun dal sport consequenta e duraivla sco er da l'engaschament da vischnancas, federaziuns, uniuns e voluntarias e voluntaris», ha accentuà il cusseglier guvernativ Parolini ed ha engrazià a tuttas e tuts per la collavuraziun.

Uffizi d'onur sut squitsch
En il Grischun s'engaschan bain anc dapli persunas voluntarmain per il sport ch'en la media svizra. Il dumber è dentant sa reducì ils ultims 6 onns. Il 2020 è anc var in quart da la populaziun grischuna s'engaschà voluntarmain per il sport. Ils ultims 12 mais era quai anc precis in tschintgavel. Il 2026 èn per l'emprima giada er dapli Grischunas e Grischuns commembers d'in center da fitness che d'ina uniun da sport. «Per las persunas creschidas daventan ils centers da fitness pli attractivs che las uniuns da sport», di Lamprecht.

Sport e moviment èn fitg impurtants
Ils pli impurtants motivs per activitads sportivas èn tenor il studi la sanadad, la fitness, l'aventura en la natira ed il plaschair da sa mover. Las pli frequentas disciplinas èn vinavant ils classichers sco viandar, ir cun velo, ir cun skis, nudar e jogging. A medem temp crescha fermamain l'impurtanza da trenar forza, far yoga ed ir cun velo da muntogna. Il far sport en la natira resta spezialmain marcant. Ultra dals resultats legraivels cuntegna il studi er ina impurtanta enconuschientscha sociala, ha accentuà il cusseglier guvernativ Parolini: «L'activitad sportiva s'augmenta, il moviment quotidian dentant betg en la medema dimensiun. Cun auters pleds: Pli pauc che nus ans muvain en il mintgadi e pli impurtant ch'i vegn da cumpensar la mancanza da moviment cun sport.» Il sport presta en quest connex bler dapli ch'ina contribuziun a la sanadad corporala. El promova il bainstar, rinforza il spiert da cuminanza e stgaffescha inscunters sur generaziuns.

Stimul per l'ulteriur svilup
Ils resultats positivs, ma er il fatg che las uniuns perdan commembers, animeschan il chantun da promover vinavant il sport en moda consequenta. «Nus vulain pussibilitar l'access al sport ed al moviment per tut las persunas, rinforzar vinavant las vischnancas e promover la cultura d'uniuns», ha ditg il cusseglier guvernativ Parolini. Questa strategia chatta tenor il studi er in vast consentiment da la populaziun grischuna. «Il sport ha ina fitg gronda impurtanza per la populaziun grischuna. Cun la promoziun chantunala dal sport èn ins per gronda part cuntent», uschia Lamprecht.

Agiuntas:

Infurmaziuns:

  • Cusseglier guvernativ, dr. Jon Domenic Parolini, schef dal Departament da furmaziun, ambient e cultura, e‑mail jondomenic.parolini@dbuk.gr.ch
  • Thierry Jeanneret, manader da la partiziun Sport / graubündenSport, tel. +41 81 257 27 51 (cuntanschibel da las 13.00 fin las 17.00), e‑mail thierry.jeanneret@avs.gr.ch
  • Dr. phil. Markus Lamprecht, Observatori svizzer da sport, c/o Lamprecht & Stamm Perscrutaziun sociala e cussegliaziun, tel. +41 44 260 67 60, e‑mail markus.lamprecht@lssfb.ch
Responsabladad: Departament da furmaziun, ambient e cultura
Neuer Artikel