Navigation

Inhaltsbereich

  • Erste Mitteilung
  • Neuen Beitrag einfügen

La regiuvinaziun natirala dal guaud en il territori da retschertga – Surses, Val d'Alvra, regiun da Tavau – vegn restrenschida sin 52 pertschient da la surfatscha da guaud tras ruissas da selvaschina. La populaziun da selvaschina en il Grischun Central è gia vegnida reducida cleramain ils ultims onns. Il nov Rapport davart il guaud e la selvaschina duai garantir in proceder coordinà en il guaud, en connex cun la chatscha, da las vischnancas e d'ulteriuras persunas participadas. La finamira è quella da smesar las surfatschas problematicas e d'agir fin l'onn 2032 e da garantir uschia a lunga vista la funcziun da protecziun dal guaud.

La mesemna è vegnì preschentà a Bravuogn il Rapport davart il guaud e la selvaschina Tavau-Alvra-Surses. El mussa: En grondas parts dal territori da retschertga è l'influenza da la selvaschina memia gronda. Il rapport ch'è vegnì elavurà ensemen cun las vischnancas sco proprietarias da guaud e cun las secziuns da chatschaders s'orientescha a la strategia «Spazi da viver guaud-selvaschina 2021» e persequitescha mesiras coordinadas per ina relaziun equilibrada tranter il guaud e la selvaschina.

Regiuvinaziun dal guaud periclitada pervia da la selvaschina
Ils guauds grischuns protegian en blers lieus abitadis e vias da traffic cunter privels da la natira. Quant impurtanta che questa funcziun è, è sa mussà a chaschun da l'occurrenza da medias en il guaud da protecziun stip sur la lingia da l'Alvra da la Viafier retica e sur la via chantunala vers Bravuogn. «Per la vischnanca da Bravuogn Filisur ha il guaud ina impurtanza enorma. El protegia grondas parts dals vitgs e da las vias da traffic cunter privels da la natira e porscha spazi da viver per ils animals selvadis», di il president communal Luzi Schutz. Per ch'il guaud da protecziun restia stabil a lunga vista, sto el pudair sa regiuvinar sin via natirala cun spezias da plantas che correspundan al lieu. En il territori da retschertga – Surses, Val d'Alvra, regiun da Tavau – vegn questa regiuvinaziun restrenschida memia fitg sin 52 pertschient da la surfatscha da guaud tras ruissas da selvaschina.

Pervia da la selvaschina mancan spezias da bostgs principalas u lateralas sco l'aviez, l'ischi da muntogna u il culaischen. «Sin ina gronda part da la surfatscha giuditgada n'è la regiuvinaziun natirala cun spezias da bostgs confurmas al lieu betg pli pussaivla pervia da l'influenza da la selvaschina. Quai periclitescha a lunga vista la funcziun da protecziun dal guaud», di il selvicultur chantunal Urban Maissen.

Pertutgads spezialmain èn guauds da protecziun sur abitadis e vias da traffic en il Surses, a Tavau sco er tranter Bravuogn e la chavorgia dal Meir.

Las mesiras da chatscha fan effect
Dapi l'ultim Rapport davart il guaud e la selvaschina da l'onn 2009 è la populaziun da tschiervs l'emprim s'augmentada fermamain. Tras ina chatscha intensiva è vegnida instradada la midada da tendenza a partir da l'onn 2017 ed il dumber da tschiervs è actualmain puspè circa sin il nivel da 2009. Guardà sin questa perioda è la populaziun da chavriels restada stabila ed en connex cun ils chamutschs è vegnida observada ina reducziun. Tar questas duas spezias èn ils animals da rapina gronds in factur impurtant. Lur situaziun è sa midada fundamentalmain dapi l'ultim Rapport davart il guaud e la selvaschina cun plirs trieps da lufs e cun singuls lufs-tscherver.

«Las mesiras da chatscha dals ultims onns han mussà effect. Conflicts tranter il guaud e la selvaschina na pon dentant betg vegnir schliads mo cun la chatscha. Decisivs èn er spazis da viver cun paucs disturbis e la collavuraziun da tut las persunas participadas», di Adrian Arquint, co-manader da l'Uffizi da chatscha e pestga.

Smesar las surfatschas problematicas fin l'onn 2032
Il nov Rapport davart il guaud e la selvaschina ha la finamira da smesar las surfatschas problematicas e d'agir fin l'onn 2032. Per quest intent vegnan cumbinadas differentas mesiras: ina tgira pli intensiva dal guaud ed ina meglra prevenziun cunter donns da selvaschina, l'execuziun da la chatscha, tranter auter er cun chatschas prioritaras sistematicas en territoris da conflict, sco er la regulaziun d'activitads da temp liber. Mesiras da protecziun tecnicas cunter ruissas da selvaschina (p.ex. saivs da protecziun cunter la selvaschina) pon esser ina cumplettaziun raschunaivla en cas singuls, na bastan dentant betg per garantir duraivlamain la regiuvinaziun dal guaud.

«La segirada da noss guauds da protecziun è ina incumbensa cuminaivla. Ils progress ch'èn vegnids fatgs fin ussa en connex cun la regulaziun da las populaziuns da selvaschina èn impurtants. Ussa stuain nus accordar las mesiras consequentamain ina cun l'autra e procurar cuminaivlamain, ch'il guaud possia sa regiuvinar sin via natirala. Quai reussescha mo, sche tut las persunas participadas surpiglian responsabladad e collavuran a lunga vista», di la cussegliera guvernativa Carmelia Maissen, scheffa dal Departament d'infrastructura, energia e mobilitad.

Agiuntas:

Infurmaziuns:

  • Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
  • Urban Maissen, selvicultur chantunal, manader da l'Uffizi da guaud e privels da la natira, tel. +41 81 257 38 51 (cuntanschibel da las 14.30 fin las 15.30), e‑mail Urban.Maissen@awn.gr.ch
  • Adrian Arquint, co-manader da l'Uffizi da chatscha e pestga, tel. +41 81 257 38 91 (cuntanschibel da las 13.30 fin las 14.30), e‑mail Adrian.Arquint@ajf.gr.ch


Responsabladad: Departament d'infrastructura, energia e mobilitad

Neuer Artikel