Navigation

Inhaltsbereich

  • Erste Mitteilung
  • Neuen Beitrag einfügen
La Regenza ha prendì posiziun davart midadas ch'èn planisadas en la Lescha da bancas ed en l'Ordinaziun da liquiditad per sviluppar vinavant las mesiras «too big to fail». Plinavant ha ella approvà in project da rempars dal Kettbach a Cazas sco er ina correcziun da la via dal Pass dal Fuorn a Zernez.

La Regenza sustegna cun resalva las midadas planisadas en la Lescha da bancas ed en l'Ordinaziun da liquiditad

La Regenza ha prendì posiziun davart in project da consultaziun dal Departament federal da finanzas (DFF) en connex cun midadas planisadas en la Lescha da bancas ed en l'Ordinaziun da liquiditad. Las midadas da lescha proponidas da la Confederaziun cuntegnan differentas mesiras centralas per reducir ristgas per la stabilitad dal sistem da finanzas svizzer, per garantir la cuntinuaziun d'impurtantas funcziuns da l'economia publica e per evitar agids statals. Cun il pachet da mesiras prenda il Cussegl federal en mira da rinforzar e da sviluppar vinavant il dispositiv «too big to fail». 

La Regenza grischuna beneventa la finamira dal project, d'augmentar la stabilitad dal sectur bancar svizzer. Dal naufragi da la Credit Suisse ston vegnir tratgas conclusiuns che reduceschan il privel d'insolvenza da bancas ch'èn relevantas per il sistem. Correspundentamain ston las mesiras s'orientar en emprima lingia a las bancas ch'èn relevantas per il sistem. La Regenza fa attent, che regulaziuns pli extendidas stoppian esser commensuradas per ulteriuras bancas e resguardar ils profils da ristgas da questas bancas. Ella è da l'avis, ch'ils sbozs previs n'adempleschian betg suffizientamain questa necessitad. Plinavant renviescha la Regenza a la posiziun da la Conferenza da las directuras e dals directurs chantunals da finanzas (CDF) dals 23 d'october 2026, ch'ella sustegna.

Consultaziuns dal Departament federal da finanzas (DFF)

Infurmaziuns: Departament da finanzas e vischnancas

La Regenza ha prendì posiziun davart in project da consultaziun dal Departament federal da finanzas (DFF) en connex cun midadas planisadas en la Lescha da bancas ed en l'Ordinaziun da liquiditad.

Approvaziun e contribuziuns per rempars dal Kettbach

La Regenza ha approvà in project da la vischnanca da Cazas per construir rempars per lung dal Kettbach. Per quest project ha ella permess ina contribuziun tenor la Cunvegna da program da la nova gulivaziun da finanzas (NGF) cun la Confederaziun en il sectur «Privels da la natira gravitativs tenor la Lescha davart la correcziun dals curs d'aua». Als custs budgetads da circa 5,66 milliuns francs ha ella garantì a la vischnanca ina contribuziun chantunala da circa 1,13 milliuns francs tenor la Lescha davart la correcziun dals curs d'aua sco er ina contribuziun chantunala da 509 535 francs tenor la Lescha davart las vias. Plinavant ha ella disponì ina contribuziun federala maximala da circa 1,98 milliuns francs. 

Il Kettbach nascha sin la Mantogna sur Sarn. Al pe da la spunda arriva l'aual en il territori d'abitadi da Cazas. En in aualet stretg e per part chanalisà traversa l'aua il center dal vitg, curra sur la planira averta da Monté e sbucca en il chanal da la Nolla. En il territori d'abitadi ed en la planira ha l'aual sin plirs trajects deficits areguard la protecziun cunter aua gronda sco er deficits architectonics. Quest project prevesa tranter auter da revitalisar e da schlargiar l'aual Valleina, d'engrondir e da sbassar ils chanals existents sco er da remplazzar e d'adattar differents bischens e tumbins. Ultra da quai èsi planisà da construir in nov rempar en il territori da Monté. Il project vegn realisà en etappas e coordinà cun ulteriuras lavurs communalas da construcziun bassa (conducts d'ovra e vias).

Kettbach Kettbach Drohnenaufnahme

Infurmaziuns: Departament d'infrastructura, energia e mobilitad

La Regenza ha approvà in project da la vischnanca da Cazas per construir rempars per lung dal Kettbach.

Glisch verda per la correcziun da la via dal Pass dal Fuorn

La Regenza ha approvà il project d'exposiziun per la correcziun da la via dal Pass dal Fuorn sin il traject da la punt Val Naira en la vischnanca da Zernez. Tut en tut custa il project circa 1,3 milliuns francs.

La via dal Pass dal Fuorn è ina impurtanta axa da traffic dal chantun che collia l'Engiadina Bassa sur il Pass dal Fuorn e la Val Müstair cun il Tirol dal Sid. Ella maina da Zernez fin al nord da Müstair al cunfin da l'Italia. La punt Val Naira sa chatta sin quest trassé da via tranter Il Fuorn e Buffalora. Pervia dals donns chaschunads da la bova dal fanadur 2022 e pervia da la capacitad da deflussiun manglusa èsi planisà da remplazzar la punt existenta construida l'onn 1990. La structura purtanta è donnegiada ed il tagl traversal da deflussiun sco er la furma dal chanal n'adempleschan betg pli las pretensiuns. En il rom dal project vegn la punt schlargiada per circa 5 m simmetricamain a l'axa dal chanal. Il profil da deflussiun vegn auzà per circa 0,4 m e schlargià sin almain 10 m. La senda da viandar vegn manada sur in piogn per lung da la punt da la vart vers engiu. Cun la construcziun tschernida e l'apparientscha adattada vegni tegnì quint da l'integraziun en la cuntrada sensibla dal Parc Naziunal.

Ofenbergstrasse Ofenbergstrasse

Infurmaziuns: Departament d'infrastructura, energia e mobilitad 

Die Regierung genehmigt ein Auflageprojekt für die Korrektion der Ofenbergstrasse auf dem Abschnitt Punt Val Naira in der Gemeinde Zernez.

Neuer Artikel
Responsabladad: Regenza