Procedura electorala da proporz

Las 120 commembras e commembers dal Cussegl grond vegnan elegids tenor la procedura electorala da proporz. Partidas u gruppaziuns (gruppas da glistas) pon inoltrar propostas electoralas (glistas) en tuts u mo en singuls circuls electorals. Colliaziuns da glistas n’èn betg permessas.

Cun lur cedel electoral pon las electuras ed ils electurs dar maximalmain tantas vuschs sco il dumber da deputadas e deputads ch’èn d’eleger en lur circul electoral. Mintga vusch per ina candidata u in candidat è a medem temp ina vusch per la gruppa da glistas respectiva..

Pukelsheim dubel

Ils sezs vegnan repartids tenor la metoda dal «Pukelsheim dubel» (procedura da l’attribuziun dals sezs proporziunala dubla). Cun questa procedura vegnan ils 120 sezs attribuids sco emprim a las partidas u gruppaziuns (gruppas da glistas) en l’entir chantun – en proporziun da lur quotas d’electuras ed electurs (attribuziun superiura). En in proxim pass vegnan ils sezs da las gruppas da glistas repartids sin las singulas glistas
en ils circuls electorals (sutattribuziun). La finala vegnan ils sezs repartids entaifer las glistas sin las candidatas ed ils candidats cun las pli bleras vuschs, a norma dals sezs obtegnids.

Quorum / cundiziun da maiorz

Per las elecziuns dal Cussegl grond vala in quorum legal sin plaun chantunal. Quai vul dir: ina partida u gruppaziun (gruppa da glistas) sto cuntanscher ina quota d’electuras ed electurs d’almain 3 pertschient en il chantun per vegnir resguardada tar la repartiziun dals sezs. Ultra da quai vala ina cundiziun da maiorz: en mintga circul electoral survegn la glista cun las pli bleras vuschs almain in sez, sche la gruppa glistas (partida u gruppaziun) ha il dretg d’in tal sez tenor l’attribuziun superiura (sin plaun chantunal)..