Las elecziuns dal cussegl naziunal han lieu mintga 4 onns la segund ultima dumengia d'october. Il termin per l'elecziun da renovaziun dal cussegl naziunal per la durada d'uffizi da 4 onns che cumenza cun la sessiun d'enviern 2019 è dumengia, ils 20 d'october 2019. Ils tschintg sezs dal chantun Grischun en il cussegl naziunal vegnan surdads tenor la procedura electorala da proporz. Il dretg d'eleger han quellas persunas che han il dretg da votar. Elegiblas resp. elegibels èn las candidatas ed ils candidats che figureschan sin las glistas. Per las elecziuns dal cussegl naziunal en il chantun Grischun valan ils suandants termins:

• emprim termin pussaivel per inoltrar glistas electoralas: 20 da matg 2019
• ultim termin per inoltrar glistas electoralas: 5 d'avust 2019
  (ston arrivar tar la chanzlia chantunala fin il pli tard las 18.00)
• ultim di per midar las glistas inoltradas: 12 d'avust 2019
• ultim di per declerar colliaziuns da glistas: 12 d'avust 2019
• publicaziun da las glistas electoralas: 13 d'avust 2019
• publicaziun da las glistas electoralas en il fegl uffizial: 15 d'avust 2019
• elecziuns dal cussegl naziunal: 20 d'october 2019

Quests termins ed ulteriuras infurmaziuns èn vegnids publitgads en il fegl uffizial chantunal dals 24 da schaner 2019.

Regulaziun per numerar las glistas
Las glistas vegnan numeradas tenor la successiun da las propostas electoralas inoltradas. Sche pliras glistas electoralas vegnan inoltradas il medem di, decida la sort davart la numeraziun.