Las elecziuns dal Cussegl dals chantuns èn elecziuns chantunalas. Ellas han lieu mintga 4 onns la segund ultima dumengia d'october ensemen cun las elecziuns dal Cussegl naziunal. Il termin per las elecziuns da renovaziun dal Cussegl dals chantuns per la durada d'uffizi da 4 onns che cumenza cun la sessiun d'enviern 2023 è dumengia, ils 22 d'october 2023. Ils dus sezs dal chantun Grischun en il Cussegl dals chantuns vegnan surdads tenor la procedura electorala da maiorz. Il dretg d'eleger ed il dretg da vegnir elegida u elegì han tut las burgaisas ed ils burgais svizzers che han cumplenì 18 onns, che han lur domicil politic en il chantun, che n'èn betg sut curatella cumplessiva u na vegnan betg represchentadas u represchentads d'ina persuna incumbensada da prevenziun pervia d'ina inabilitad permanenta da giuditgar. Il dretg d'eleger activ e passiv han spezialmain er las Svizras ed ils Svizzers che vivan a l'exteriur e ch'èn registrads en il chantun.

In segund scrutini ha lieu, sch'in u tuts dus sezs restan vacants en l'emprim scrutini, perquai che las candidatas ed ils candidats n'han betg cuntanschì la maioritad absoluta. Quest segund scrutini avess lieu ils 12 da november 2023.