L'admissiun e la preschientscha da burgais d'in stadi terz (burgais da stadis che n'èn betg commember d'UE/AECL) vegnan regladas en la lescha federala davart esters ed estras e davart l'integraziun ed en l'ordinaziun davart l'admissiun, la dimora e l'activitad da gudogn.

Permissiuns da dimora a burgais d'in stadi terz vegnan mo dadas en cas excepziunals, sch'i sa tracta da lavurants qualifitgads u motivs spezials giustifitgeschan in'excepziun. Dumondas per accordar permissiuns da dimora a burgais d'in stadi terz ston ins giustifitgar pli precis; cunzunt ston ins explitgar, or da tge che consista la situaziun excepziunala.

Il proceder a l'exteriur è d'applitgar. La decisiun davart il proceder da dumonda ston ins spetgar en l'exteriur.

Suenter avair preschentà la disposiziun positiva da l'Uffizi da lavur chantunal vegn emessa in'autorisaziun per la concessiun da visum tras l'uffizi da migraziun e tramessa al patrun. Il lavurant/la lavuranta sto s'annunziar tar la represchentanza svizra cumpetenta per la retratga dal visum d'entrada suenter avair survegnì l'autorisaziun.

Per l'annunzia dovran ins ultra dal formular da dumonda la garanzia originala/la concessiun ed ina copia dal pass sco era ina copia dal visum d'entrada. L'annunzia ston ins far entaifer 14 dis suenter l'entrada tras la controlla d'abitants cumpetenta da la vischnanca da domicil en il chantun Grischun dal petent.

Ulteriuras infurmaziuns survegnis Vus dal Ressort d'entrada, numer da telefon: 081 257 25 25.

Link als formulars da dumonda