Navigation

Inhaltsbereich

Posiziun da la procura publica

La procura publica è in organ da la giurisdicziun penala ch'è funcziunalmain e materialmain independent. Administrativamain è ella attribuida al departament da giustia, segirezza e sanadad. Areguard la chaussa sezza è ella suttamessa directamain a la lescha ed al dretg. L'independenza ch'è colliada cun quai excluda che la regenza ed il cussegl grond han in dretg da dar directivas ed ordinaziuns areguard las singulas inquisiziuns penalas.

Incumbensas

En cas da crims, da delicts e da surpassaments fa la procura publica inquisiziuns penalas envers creschids e giuvenils e sto far valair il dretg da chastiar. Plinavant elavura la procura publica dumondas d'assistenza giudiziala interchantunalas ed internaziunalas.

Organs

L'emprim procuratur public e ses substitut mainan la procura publica.

Procuraturas e procuraturs publics fan las inquisiziuns penalas envers creschidas, procuraturas e procuraturs per giuvenils quellas envers giuvenils.

Il mandat penal

Sche la persuna creschida accusada ha confessà ils fatgs durant la procedura preliminara u sche quels èn sclerids suffizientamain en in'autra moda, relascha la procura publica il mandat penal, sch'ella - considerond in chasti cundiziunà che po eventualmain vegnir revocà u ina relaschada cundiziunada - crai ch'in dals suandants chastis è suffizient:
  • ina multa;
  • in chasti pecuniar da maximalmain 180 taxas per di;
  • in chasti che privescha da la libertad da maximalmain 6 mais.
En cas da surpassaments pon referendarias u referendaris relaschar independentamain mandats penals.

Autoritad d'accusaziun ed autoritad da meds legals

Avant las dretgiras regiunalas represchenta la procura publica l'accusaziun, ella ha era il dretg da far appellaziun cunter las sentenzias da talas tar la dretgira chantunala. Cunter sentenzias da la dretgira chantunala po ella far recurs en chaussas penalas tar il tribunal federal.

Lieus

La sedia principala da la procura publica è a Cuira. Ella dispona d'agenturas a Tavo, a Glion, a Roveredo, a Samedan ed a Tusaun

Skript-Editor