La marca graubünden exista dapi l'onn 2003. Ella è vegnida fundada en il rom dal Program da la Regenza 2000-2004, en il qual è vegnida pretendida da la Regenza ina «marca regiunala che cumpiglia pliras branschas» per rinforzar persistentamain il Grischun sco plazza economica. La marca graubünden è en proprietad dal chantun Grischun, represchentà da l'Uffizi per economia e turissem (UET).
La finamira da la marca graubünden è quella da
- focussar sut aspects qualitativs;
- communitgar vers anen e vers anora en moda pregnanta;
- promover en moda persistenta
prestaziuns pitschnas e grondas, marcas existentas e prosperantas.
Cun l'orientaziun da la marca sco «NaturMetropole» è vegnida fixada il 2013 ina finamira che duai permetter al Grischun er en l'avegnir d'avair success en la concurrenza naziunala ed internaziunala da las regiuns turisticas. La designaziun «NaturMetropole» stat per ina accumulaziun spessa d'aventuras d'auta qualitad en la natira ed en la cultura che caracteriseschan, distinguan e differenzieschan il Grischun da ses concurrents. Las fassettas multifaras da la «NaturMetropole» duain vegnir francadas en l'imaginaziun da las gruppas en mira definidas sco maletg marcant e nunconfundibel.
Proprietari dals dretgs da marca da la marca graubünden è il chantun. Il chantun ha
- surdà in mandat per manar il secretariat da la marca graubünden.
- fixà ina incarica da prestaziun cun l'uniun Grischun Vacanzas per realisar il project «Enavant» (campagna dals capricorns).