Il project da refurma "Structuras cumpetitivas e repartiziun da las incumbensas en il turissem grischun" ha mess en moviment bler en il turissem grischun. En connex cun la refurma dal turissem èn vegnidas schliadas en il chantun las structuras ch'eran sa furmadas durant onns ed ins ha chattà novas furmas per collavurar e repartir las incumbensas. Il turissem grischun è oz bler pli cumpetitiv – e las incumbensas tranter ils singuls acturs èn repartidas en moda bler pli clera. Da las 92 organisaziuns turisticas da quella giada per il pli localas èn resultadas quatter organisaziuns per la gestiun da destinaziuns (OGD) e pliras organisaziuns turisticas regiunalas (OTReg). La bilantscha da la refurma da las structuras per il turissem grischun ch'il chantun ha obtegnì ensemen cun tut ils acturs impurtants da la branscha durant ils onns 2006 fin 2013, è positiva: In aut grad da professiunalisaziun è vegnì cuntanschì areguard la direcziun da las destinaziuns, lur commerzialisaziun e la concepziun da lur purschidas. La nova regulaziun da la finanziaziun dal turissem n'ha dentant betg pudì vegnir realisada, perquai che la lescha chantunala davart il turissem è vegnida refusada a l'urna. Las novas structuras da destinaziun ston pia vegnir finanziadas vinavant cun agid da leschas communalas davart il turissem. Las vischnancas ston ussa chattar atgnas soluziuns per garantir la coordinaziun da las incumbensas e la finanziaziun dal turissem en lur destinaziuns.

Il project da refurma dal turissem "Structuras cumpetitivas e repartiziun da las incumbensas en il turissem grischun" è ì a fin la fin da l'onn 2013.

En ina broschura d'infurmaziun vegnan descrittas en ina moda bain survesaivla la furmaziun d'ina destinaziun en las singulas valladas dal chantun sco er las mesiras accumpagnantas.