Nus tuttas e nus tuts meritain ina segirezza sociala, ina protecziun cunter invaliditad e cunter dischoccupaziun e – suenter la pensiun – ina renta. La lavur illegala periclitescha quest progress social e fa uschia donn a nus tuttas ed a nus tuts. En cas da lavur illegala na vegnan:

• betg pajadas contribuziuns socialas (AVS, AI, AD e.u.v.);
• betg dumandadas permissiuns da lavur;
• betg suttamess a la taglia il salari e la svieuta.

La lavur illegala n'è betg ina bagatella. Tant las patrunas ed ils patruns illegals sco er las lavurantas ed ils lavurants illegals cuntrafan a la lescha.

Diversas furmas

La lavur illegala è definida sco ina lavur pajada, independenta u dependenta, la quala è legala sco activitad per se, ma la quala cuntrafa a prescripziuns legalas cur ch'ella vegn pratitgada. La lescha federala davart las mesiras per cumbatter la lavur illegala (LFLI) descriva differentas furmas da lavur illegala:

• L'occupaziun da lavurantas e da lavurants che n'èn betg annunziads tar las assicuranzas socialas obligatoricas.
• L'execuziun da lavurs che n'èn betg vegnidas annunziadas tras lavurantas e lavurants che violeschan il dretg da persunas estras.
• L'occupaziun da lavurantas e da lavurants ch'èn suttamess a la taglia a la funtauna, ma che na vegnan betg annunziads a las autoritads da taglia.
• Da lavur illegala sa tracti er, sche las svieutas ch'èn suttamessas a la taglia sin la plivalur na vegnan betg annunziadas a las autoritads.

La lescha e l'ordinaziun

La lescha federala e l'ordinaziun federala davart las mesiras per cumbatter la lavur illegala permettan da cumbatter en moda coordinada ed effizienta la lavur illegala en Svizra.
 

Mesiras

Il sistem da rendaquint simplifitgà facilitescha a las patrunas ed als patruns d'annunziar lur emploiadas e lur emploiads a las assicuranzas socialas ed a las autoritads fiscalas. La lescha rinforza las cumpetenzas da controlla e meglierescha la coordinaziun cun las autoritads e cun las organisaziuns pertutgadas.