Resgia da Domat: Investider interessà discurra cun proprietaris da guaud e cun furniturs da laina  

13.05.2011
Il concern da laina tirolais EGGER mussa grond interess da surpigliar la resgia da Domat. Per quai ston però esser avant maun empermischuns liantas ch'i vegnia furnida avunda laina radunda. Quella duai vegnir garantida a lunga vista en il rom da partenadis cun las vischnancas grischunas sco er cun furniturs extrachantunals.
 
En la procedura da concurs da la Mayr-Melnhof Swiss Timber SA che dura enconuschentamain anc fin il cumenzament da las vacanzas da stad deriva l'offerta la pli auta d'in offerent che vul demontar la resgia. Da l'autra vart datti però er investiders pussaivels, dals quals EGGER ha ussa rendì public ses interess. Cun in partenari da minoritad svizzer vuless EGGER puspè avrir la resgia a Domat e far ulteriuras investiziuns en las producziuns posteriuras. Sin invitaziun da l'uffizi forestal dal Grischun ha EGGER preschentà la firma e ses concept als selviculturs dal Grischun a chaschun d'ina dieta d'expertas e d'experts.

Concept nov cun EGGER
L'investider pussaivel EGGER da St. Johann en il Tirol è ina interpresa europeica dominanta da l'industria dals materials da lain. Cun 16 manaschis en l'Europa posseda EGGER in sortiment da products fitg diversifitgà. Cun la resgia a Domat engrondiss EGGER ses sectur da resgia e rinforzass la chadaina da laina enavos fin a la materia prima. Per survegnir in'empermischun che avunda laina radunda vegniss furnida, propona EGGER a l'economia forestala ed a la selvicultura dal Grischun sco er als furniturs da laina extrachantunals in model per furmar ils pretschs tenor criteris da l'economia da martgà. Il model qua avant maun divergescha essenzialmain da quel da Mayr-Melnhof che ha previs in subvenziunament direct dal pretsch da la laina radunda tras il chantun.

Model da contract tenor criteris da l'economia da martgà
L'offerta dad EGGER prevesa in partenadi a lunga vista da diesch onns. Las parts contrahentas èn oravant tut las vischnancas sco proprietarias da guaud resp. organisaziuns chantunalas ed extrachantunalas da la commerzialisaziun da laina. Cun contracts da lunga durada indexads duai la furniziun annuala d'almain 150'000 meters cubic laina radunda dal Grischun e d'ulteriurs 150'000 meters cubic d'auters chantuns vegnir segirada. EGGER manass la resgia bain sco firma independenta, integrass quella però – cuntrari a l'anteriur proprietari Mayr-Melnhof – dal tuttafatg en las structuras da ses concern e la concediss in manaschament independent a Domat. Actualmain curran las tractativas davart la conclusiun dals contracts a lunga vista necessaris. Il chantun spera ch'ils furniturs da laina radunda profiteschian ensemen cun la federaziun forestala dal Grischun "Selva", cun Grischun laina, cun las organisaziuns per commerzialisar laina Reziaholz, Lenca Grischun e Prättigau/Landschaft Davos Forst (PLD Forst) sco er cun la federaziun grischuna dals impressaris forestals da questa gronda schanza per la resgia a Domat.

Profit per ils proprietaris da guaud grischuns
Il model da partenadi garantescha in svilup dals pretschs regular, cuntinuà ed orientà al martgà. Uschia daventi pussaivel da planisar e da calcular meglier l'utilisaziun da la laina ch'è indispensabla en il rom da la tgira dal guaud. Il model è concepì a lunga vista, è orientà a la durabilitad e porscha transparenza cumplaina. Er en cas da catastrofas da la natira è la segirezza da vendita garantida. Actualmain vegnan anc adina exportads dapli che 500'000 meters cubic laina radunda da la Svizra. Il lieu indigen Domat cun sia ulteriura elavuraziun correspundenta pussibilitescha en Svizra ina valurisaziun per pretschs da transport bass e stgaffescha uschia in'utilisaziun persistenta da las resursas.

Il chantun examinescha ina contribuziun
Perquai che EGGER planisescha er da far investiziuns en producziuns posteriuras e pussibilitescha uschia ina valurisaziun chantunala per lung da la chadaina da laina, examinescha il chantun actualmain la pussaivladad da sustegnair questas investiziuns.


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01


Gremi: departament da construcziun, traffic e selvicultura
Funtauna: rg departament da construcziun, traffic e selvicultura