Communicaziun da la regenza dals 19 da matg 2011  

19.05.2011

En sia consultaziun a la confederaziun beneventa la regenza grischuna l'extensiun proponida da la giurisdicziun constituziunala sin plaun federal.

Sustegn per l'extensiun da la giurisdicziun constituziunala
La regenza grischuna beneventa l'extensiun proponida da la giurisdicziun constituziunala sin plaun federal. Per questa extensiun pledan motivs dal stadi da dretg e motivs federalistics sco er las experientschas ch'èn vegnidas fatgas cun la giurisdicziun constituziunala sin plaun chantunal. Quai menziunescha la regenza en sia resposta da consultaziun concernent la giurisdicziun constituziunala tar iniziativas parlamentaras.
La maioritad da la cumissiun per dumondas giuridicas dal cussegl naziunal propona d'abolir l'artitgel 190 da la constituziun federala. Applitgond leschas federalas en moda concreta sco p.ex. tras ordinaziuns federalas e tras relaschs chantunals, pudessan quellas alura vegnir examinadas areguard la cumpatibilitad cun la constituziun federala e cun il dretg internaziunal.
Gia en il rom da la revisiun totala da la constituziun federala è il chantun Grischun s'exprimì per l'extensiun da la giurisdicziun constituziunala sin plaun federal. Quella porscha als chantuns – en il senn d'in federalissem activ e cooperativ – la pussaivladad da salvar lur cumpetenzas constituziunalas e da rinforzar uschia lur posiziun. Ord vista da la regenza grischuna chaschuna la proposta dentant differentas dumondas areguard la realisaziun. Perquai animescha ella da prender per mauns – ensemen cun la midada constituziunala proponida – las adattaziuns necessarias sin il stgalim da las leschas.

Da vischnancas e da regiuns 

  • Schluein: La nova constituziun da la vischnanca da Schluein dals 6 d'avrigl 2011 vegn approvada.
  • Samignun: La lescha per promover la construcziun d'emprimas abitaziuns e per restrenscher la construcziun d'abitaziuns secundaras, concludida da la vischnanca da Samignun ils 13 da zercladur 2010, vegn approvada.
  • Tujetsch: La revisiun parziala da la planisaziun locala che la vischnanca da Tujetsch ha concludì ils 13 da favrer 2011 en vista a la realisaziun d'in lai da far bogn vegn approvada.

 
Projects da vias
La regenza ha approvà totalmain 985'000 francs per construir e per sanar il suandant traject da via:
- via sursilvana: lavurs d'impressari, Trin Mulin – Felsbach


Chaussas persunalas 

  • Nov incumbensà per l'infurmaziun tar la chanzlia chantunala daventa Luzi Bürkli, domicilià a Cuira. El cumenza sia plazza ils 2 d'avust 2011.
  • Sandra Felix, domiciliada a Haldenstein, è vegnida elegida sco nova secretaria dal departament d'economia publica e fatgs socials.

 

Gremi: regenza
Funtauna: rg chanzlia chantunala dal Grischun