Elecziuns dal cussegl naziunal 2011: 15 glistas per il Grischun  

06.09.2011
Ils 23 d'october 2011 han lieu las elecziuns dal cussegl naziunal. Entaifer il termin fixà èn entradas or dal circul electoral Grischun 15 glistas electoralas cun totalmain 69 candidatas e candidats (17 dunnas e 52 umens). A chaschun da las ultimas elecziuns dal cussegl naziunal da l'onn 2007 eran vegnidas inoltradas 13 glistas electoralas cun totalmain 61 candidatas e candidats (22 dunnas e 39 umens).

En il chantun Grischun è la numeraziun da las glistas per las elecziuns dal cussegl naziunal vegnida reglada da nov. Per consequenza n'è betg pli la fermezza da las partidas u da las organisaziuns a chaschun da las ultimas elecziuns decisiva per la numeraziun, mabain la successiun, en la quala las glistas electoralas vegnan inoltradas. Sche pliras glistas electoralas vegnan inoltradas il medem di, decida la sort davart la numeraziun.

L'emprim termin per inoltrar glistas electoralas è stà glindesdi, ils 23 da matg 2011. Quel di èn entradas 13 glistas tar la chanzlia chantunala dal Grischun. Il di suenter è vegnida tratga la sort davart la numeraziun da las glistas. Ulteriuras glistas electoralas han pudì vegnir inoltradas fin a l'ultim termin ch'è stà glindesdi, ils 5 da settember 2011. Dapi ils 23 da matg èn vegnidas vitiers duas ulteriuras glistas. L'ultim termin per midar las glistas inoltradas e per declerar colliaziuns da glistas è ils 12 da settember 2011.

Las glistas:

Glista 1 PPS Grischun B
Glista 2 PPS Internaziunala
Glista 3 Partida Socialdemocratica PS
Glista 4 PPS Grischun L
Glista 5 PBD dal Grischun
Glista 6 Partida socialdemocratica – GS
Glista 7 PCD Grischun
Glista 8 PLD. Ils liberals GR
Glista 9 Partida verd-liberala (PVL)
Glista 10 GPPS dal Grischun
Glista 11 PCD – ils giuvens
Glista 12 Giuvna PBD
Glista 13 VERDA – Grünes Graubünden
Glista 14 PLD dal Grischun, giuvens liberals
Glista 15 Uniun democratica federala dal Grischun

Ina survista detagliada incl. ils nums da las singulas candidatas e dals singuls candidats stat a disposiziun en l'internet sut www.gr.ch/nrw2011 e vegn publitgada ils 8 da settember 2011 en il fegl uffizial dal chantun.


Gremi: regenza
Funtauna: rg chanzlia chantunala dal Grischun