A partir dad oz porscha il chantun Grischun in nov servetsch d'internet. Sut stipendienportal.gr.ch pon da nov vegnir inoltradas dumondas da stipendis directamain sur il portal online.

Las dumondas da stipendis pon da nov vegnir emplenidas ora cumadaivlamain sin via electronica en pliras linguas (tudestg, rumantsch, talian) ed inoltradas al servetsch per stipendis. Suenter ina simpla registraziun sur stipendienportal.gr.ch pon las petentas ed ils petents endatar online lur datas per las dumondas da stipendis, las arcunar temporarmain e las elavurar. La nova applicaziun d'internet maina las utilisadras ed ils utilisaders pass per pass e chapaivlamain tras la registraziun da las datas da la dumonda. Grazia a texts d'agid vegnan scleridas intschertezzas e respundidas dumondas cun emplenir il formular. La dumonda da stipendis emplenida ora cumplettamain po alura vegnir tramessa sin via electronica al servetsch cumpetent. Per posta ston mo pli vegnir inoltrads il fegl principal ch'è munì cun las suttascripziuns necessarias e cun ils codes a travs sco er las agiuntas a la dumonda. L'access po avair lieu sur il portal er cun agid da SuisseID.
Da quest nov servetsch d'internet online na profitan betg mo las petentas ed ils petents, mabain er l'administraziun. Grazia a l'instrucziun per las utilisadras ed ils utilisaders duessan las dumondas returnadas esser emplenidas ora pli correctamain e cumplettamain, quai che duess spargnar dumondas da scleriment da vart dal post da servetsch. Mintga onn vegnan inoltradas al servetsch per stipendis circa 2800 dumondas. Ultra da quai permetta l'import automatisà da las datas da reducir considerablamain ils sbagls. Questa purschida electronica è vegnida lantschada tranter auter en il rom dal e-government dal chantun Grischun. 
 

Infurmaziuns:
Pino Dettli, servetschs dal departament, departament d'educaziun, cultura e protecziun da l'ambient (DECA), tel. 081 257 27 26, e-mail Pino.Dettli@fc.gr.ch  
 

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient