"Nutrire il pianeta – energia per la vita". Il motto da l'Expo 2015 a Milaun metta ils temas "alimentaziun" e "persistenza" en il center. Tge relaziun han quests temas cun il Grischun? En il project cuminaivel dal chantun Grischun, da la scola svizra a Milaun e da la scola auta da tecnica ed economia SATE a Cuira sa chattan gia bleras respostas, schebain che quai è pir l'emprim pass creativ dal Grischun a l'Expo.
Exactamain en in onn, il 1. da matg 2015, avra l'Expo 2015 a Milaun sias portas. Ord vista da la direcziun dal project è quai precis il dretg mument per render enconuschent ils temas da l'Expo 2015 a la populaziun grischuna, da lantschar ina discussiun publica en chaussa, ma er per preschentar la contribuziun grischuna a la populaziun da Milaun en il rom d'in di grischun, il "Giro del Gusto“, organisà da la confederaziun per ils 9 da matg 2014.
Il project "Discover Graubünden – Scoprire i Grigioni"
Il punct da partenza da quest project è stà in viadi d'exploraziun da 4 dis, per il qual 9 scolaras e scolars da la scola svizra a Milaun èn vegnids envidads da perscrutar il chantun Grischun cun lur agens egls ed ureglias, lieungas e palats, mauns e pes. Els èn vegnids accumpagnads dad 11 studentas e students dal studi "Multimedia-Production" da la SATE da Cuira. Quels han sustegnì las visitadras ed ils visitaders da Milaun cun lur enconuschientschas tecnicas davart il rapportar e davart il fotografar sco er cun lur enconuschientschas geograficas.
Da questa grondiusa cooperaziun è naschì in purtret fitg spezial da noss chantun che mintgina e mintgin po giudair sin la pagina d'internet dal project http://expo2015.gr.ch. Las producentas ed ils producents da questa pagina d'internet speran ch'i na restia betg mo tar il visiunar da questa pagina, mabain ch'ella stimuleschia a patratgs ed a discussiuns tranter las Grischunas ed ils Grischuns sezs, ma er tranter il Grischun e Milaun e sur tut ils cunfins ora e da tut ils temas che l'Expo tracta. Perquai cuntegna la pagina d'internet er dapli che mo bels maletgs dals lieus visitads. I vegnan raquintadas istorgias, formuladas observaziuns co ch'il Grischun sa preschenta en dumondas da la persistenza e preschentads concepts, elavurads da las docentas e dals docents e da las studentas e dals students da la SATE, davart il svilup futur da la segirezza da las victualias (food safety) e da l'economisaziun persistenta.
Ils 9 da matg 2014 a Milaun: Il Grischun al Giro del Gusto
Las scolaras ed ils scolaras da Milaun preschentan lur experientschas en il House of Switzerland sin la Piazza del Cannone amez Milaun en il rom da la turnea "Giro del Gusto" organisada da Preschientscha Svizra. Quest di grischun vegn accumpagnà d'in divertiment musical e da delicatessas culinaricas dal Grischun. Il "Giro del Gusto" vegn avert ils 30 d'avrigl cun in act festiv e mussa alura a la populaziun da Milaun mintga di ina part da la Svizra, citads, regiuns, cultura, economia e turissem, cun l'intenziun da la motivar da visitar in onn pli tard il pavigliun svizzer a l'Expo. Il Grischun è er preschent ils 3 da matg, cur ch'ils quatter chantuns dal Gottard Uri, Tessin, Vallais e Grischun sa preschentan cuminaivlamain. Il "Giro del Gusto" da Milaun va a fin ils 11 da matg. Il settember e l'october sa preschenta el alura a Roma ed a Turin.
Turnea a l'Expo
Ils quatter chantuns dal Gottard e la confederaziun èn sin buna via da terminar concepziunalmain ed alura da realisar il pavigliun svizzer e la preschentaziun dals chantuns. La direcziun grischuna dal project vul definir suenter la terminaziun dal "Giro del Gusto" a Milaun – sin basa da las experientschas fatgas là – la rolla e l'ulteriur svilup da "Discover Graubünden – Scoprire i Grigioni".
Fotografias agiuntadas:
Legenda: Yuri e Loredana exploreschan en il team las construcziuns artifizialas dal chantun Grischun. Engineering for safety and mobility.
Legenda: 100 % biologics ed extremamain autentics: tés dad ervas dal Puschlav
Legenda: Chaschiel da muntogna d'emprima qualitad, er dal Plantahof
Infurmaziuns:
Markus J. Haltiner, manader grischun dal project "Expo Milaun 2015", tel. 079 467 14 64, e-mail
markus.haltiner@awt.gr.ch
Gremi: uffizi per economia e turissem
Funtauna: rg uffizi per economia e turissem