Las bibliotecas communalas e da scola dal chantun Grischun èn sa colliadas en ina rait tras in catalog cuminaivel. Sut www.bibliotheken-gr.ch vegnan ad esser accessiblas proximamain da tut temp passa 200 000 medias da 30 bibliotecas en il chantun.

L'onn 2007 han fundà pliras bibliotecas da la Surselva ina plattafurma communabla cun in catalog da medias online ch'ins po consultar. I ha vulì in ulteriur svilup, dal qual duain profitar tut las bibliotecas communalas e da scola en il chantun. La cumissiun da biblioteca e l'uniun leger.GR èn s'occupadas intensivamain da questa dumonda. Cun il nov catalog cuminaivel che vegn ad esser en la rait per l'emprima giada durant l'emna da las bibliotecas grischunas dals 8 fin ils 14 da settember 2014, è ussa vegnì fatg in grond pass. Sut www.bibliotheken-gr.ch po la clientella controllar en il catalog cuminaivel, sch'in medium è disponibel, al po reservar e retrair en la biblioteca correspundenta. In avantatg tant per la clientella sco er per las bibliotecarias ed ils bibliotecaris. Las bibliotecas pon porscher ina cumplettaziun moderna da lur servetschs. Integradas duain vegnir supplementarmain er la biblioteca digitala da la Svizra orientala cun circa 23 000 medias electronicas. Il catalog cuminaivel vegn cofinanzià da las bibliotecas participadas cun in sustegn unic dal chantun Grischun e da la fundaziun Ernst Göhner.

Cun lantschar il catalog cuminaivel approfundeschan las bibliotecas communalas e da scola dal chantun Grischun lur collavuraziun en ils fatgs da biblioteca publics. Uschia ha la cumissiun da biblioteca cuntanschì in'ulteriura finamira impurtanta dal "model directiv bibliotecas en il chantun Grischun". Las bibliotecas sezzas han medemamain avantatgs, perquai ch'ellas pon surpigliar las datas dal catalog online. Cooperaziuns existan gia pertutgant la scolaziun e furmaziun supplementara bibliotecara, pertutgant la biblioteca digitala da la Svizra orientala sco er pertutgant prelecziuns d'auturas e d'auturs. Cun il catalog cuminaivel s'avischinan las bibliotecas anc pli fitg. 

Las bibliotecas participadas:
Scola media svizra alpina SAMD Tavau; biblioteca da la citad da Cuira, Arcas; biblioteca da la citad da Cuira, Aspermont; biblioteca communala Domat; biblioteca Landquart e conturns Igis-Landquart; biblioteca Samedan; biblioteca San Murezzan; biblioteca EMS Schiers; biblioteca LA PLAIV Zuoz; biblioteca populara Mustér; biblioteca Rosengarten Grüsch; biblioteca communala Claustra-Serneus; mediateca Partenz central Küblis; biblioteca Casa de Mont Laax; biblioteca Maiavilla; mediateca Müstair; biblioteca da scola e communala Stussavgia; biblioteca populara Scuol; biblioteca da scola e communala Panaduz; biblioteca communala Ftan; biblioteca da scola e communala Vaz/Lai; biblioteca communala Sent; biblioteca communala Vaz sut; biblioteca communala e da scola Arosa; mediateca Lyceum Alpinum Zuoz; biblioteca da scola e communala Glion; biblioteca Flem Vitg; biblioteca Sursaissa; biblioteca da scola e communala Val S. Pieder; mediateca communala Roveredo; biblio.ludo.teca La sorgente Puschlav. 
 

Infurmaziuns:
Theres Schlienger, incumbensada da las bibliotecas dal chantun Grischun, biblioteca chantunala dal Grischun / uffizi da cultura, tel. 081 257 28 37, e-mail Theres.Schlienger@kbg.gr.ch  


Gremi: biblioteca chantunala dal Grischun / uffizi da cultura
Funtauna: rg biblioteca chantunala dal Grischun / uffizi da cultura