Dals 29 d'avrigl 2015 als 20 da settember 2015 mussa il museum da la natira dal Grischun in'exposiziun speziala davart ils avieuls. Ina impressiun da l'exposiziun dat in nov video da la chanzlia chantunala dal Grischun sut www.gr.ch.

Sper l'avieul na datti strusch in auter animal ch'ans piztga e fa mal, ma che giauda tuttina nossa simpatia. La raschun è bain quella che l'avieul vala sco simbol d'in animal "nizzaivel", perquai ch'el impollinescha flurs e furnescha il mel prezius. Ma l'avieul da mel n'è betg l'unic avieul – passa 600 spezias d'avieuls selvadis datti en Svizra, sin l'entir mund èn quai passa 20 000. Ed impurtants èn els tuts. Sco impollinaders gidan els tuts a derasar ed a far prosperar la diversitad da las plantas selvadias e da las plantas da niz. Ma tgi enconuscha quests "auters" avieuls? Schebain che blers dad els vivan tranter nus, èn els vischins nunenconuschents. Els vivan en ierts e sin la prada, sin il terren cultivà e sin il terren nuncultivà ed as derasan da la Bassa fin en la zona alpina. Bleras spezias vivan individualmain, autras sco ils tavauns e l'avieul da mel furman pievels cun ina repartiziun da la lavur e cun ina communicaziun – e circa in quart dad els mettan, sco "avieuls cucu", lur ovs en il gnieu d'auters avieuls. Unica è la relaziun tranter ils avieuls e las flurs – els èn dependents in da l'auter, ma ils interess da l'insect e da la flur n'èn insumma betg ils medems.

L'exposiziun speziala "Il mund miraculus dals avieuls", in'atgna producziun dal museum da la natira dal Grischun, preschenta la moda da viver fascinanta dals avieuls indigens. Maletgs ed avieuls originals or da las collecziuns dal museum da la natira dal Grischun dattan ina invista en la diversitad impressiunanta da las spezias, da las colurs e da las furmas. Il connex tranter las flurs ed ils avieuls vegn illuminà en tut sia profunditad. Dioramas confurms a la realitad mussan, nua ch'ils avieuls construeschan lur gnieus, e permettan da dar in sguard en lur cuaditschs. A maun dals spazis da viver vegn ins a savair, co ch'ins po observar e promover ils avieuls. I vegn er sclerì, pertge che l'avieul da mel è daventà sco unic insect in animal da niz. Dador il museum dattan ina chasina d'avieuls e flurs impressiuns interessantas. 

Accumpagnada vegn la nova exposiziun speziala d'in program attractiv cun visitas guidadas publicas, cun referats e cun excursiuns.
Uras d'avertura: mardi fin dumengia da las 10.00 fin las 17.00, glindesdi serrà 
 

Infurmaziuns:
- Ueli Rehsteiner, directur dal museum da la natira dal Grischun, Tel. 081 257 28 43
- Flurin Camenisch, pedagog da museum, Tel. 081 257 28 45


Gremi: museum da la natira
Funtauna: rg museum da la natira