Cun il center da cumpetenza Waldhaus a Cuira duai la tratga professiunala da muvel manidel survegnir ina impurtanza pli gronda, e las consumentas ed ils consuments duain vegnir entusiasmads per ils products da latg e da charn da quests animals. Per grondas parts dal territori da muntogna fissan nursas e chauras ils dretgs animals da niz. Cun l'elavuraziun da latg e da charn pudess vegnir realisada ina valurisaziun en las valladas, perquai che las spezialitads da nursas e da chauras giaudan ina stima extraordinaria en circuls spezialisads.

Sut la direcziun dal Plantahof è il manaschi puril biologic Waldhaus a Cuira vegnì transfurmà en in center da cumpetenza per la tratga da muvel manidel. En il focus dal svilup actual dal manaschi stattan las 60 chauras strala (da quellas 20 ansiels d'allevament), las 60 nursas da latg (da quellas 20 agnels d'engrasch) e las 5 nursas-mamma. Cumplettadas vegnan las branschas purschidas cun 400 giaglinas che ovan, cun in pèr arments da tratga, cun ina plantascha da puma e cun differents pumers cun bist aut. Sin las circa 44 hectaras da la surfatscha utilisada da l'agricultura vegnan cultivads ers e producì pavel tenor las directivas da l'agricultura biologica. En spezial duain vegnir fatgas experientschas cun la cultivaziun da plantas da pavel d'albumin per reducir l'import da soja.
 
Center da cumpetenza per muvel manidel
Las persunas spezialisadas responsablas dal center da cumpetenza per muvel manidel sa deditgan en l'emprima fasa da svilup a differentas dumondas da la tecnica da producziun. Questas dumondas gidan a sviluppar vinavant il manaschi ed èn da gronda relevanza per la pratica. Ina sfida è il spustament da la fasa da lactaziun da la stad a l'enviern, quai munta da guntgir il ciclus natiral da chalira. Igl è pli raschunaivel da producir latg cur ch'el vegn dumandà sin il martgà. Ultra da quai èsi in avantatg per l'economia da lavur, sch'ils animals na ston betg vegnir mulschids sin l'alp. Tar las chauras ha l'emprima emprova funcziunà, tar las nursas da latg percunter betg uschè bain.
Ulteriuras dumondas da las emprovas tractan la tegnida adattada dals animals masculins, il mantegniment da la sanadad d'animals, l'allevament dals animals giuvens e la producziun da latg en las novas mulscheras.
Ultra da quai vegnan las scossas da remagliaders pitschens duvradas per l'instrucziun pratica da la furmaziun da basa e da la furmaziun supplementara agricula. Differents instituts da perscrutaziun mussan grond interess da collavurar cun il center da cumpetenza. En il center stattan dumondas da la sanadad dals animals, da la tegnida dals animals confurm a la spezia, da la realisaziun dal confort per ils animals e da las meglieraziuns da l'economia da lavur.
Il center da cumpetenza per muvel manidel ha en emprima lingia l'incumbensa da render populars ils products da latg e da charn da quests animals. Actualmain vegn il latg elavurà en la latgaria da spezialitads a Jenaz ed en la chascharia Maran ad Arosa. Ultra da quai cultivescha il Plantahof per ses negozis a Landquart ed al Waldhaus agens products innovativs. 
 

Infurmaziuns:
Peter Küchler, directur dal Plantahof, tel. 081 257 60 01, e-mail: Peter.Kuechler@plantahof.gr.ch  
 

Gremi: Plantahof
Funtauna: rg Plantahof