Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna augmenta il dumber da lecziuns d'englais en las scolas realas e secundaras da lingua taliana. Plinavant conceda ella contribuziuns finanzialas per la vendita da muvel en il chantun Grischun sco er per il program da promoziun dal sport GKB SPORTKIDS. 

Ina lecziun d'englais dapli en las scolas realas e secundaras da lingua taliana
La regenza grischuna ha concludì d'augmentar per il cumenzament da l'onn da scola 2015/16 il dumber da lecziuns d'englais en las scolas realas e secundaras da lingua taliana per ina lecziun per emna. Tras questa mesira vegn abolida ina differenza tranter las regiuns linguisticas. Fin ussa eran las trais regiuns linguisticas grischunas dotadas cun differents dumbers da lecziuns. Quai per resguardar meglier il dumber da lecziuns totalas en il chantun. Uschia avevan las scolaras ed ils scolars da las scolas talianas sin il stgalim secundar I ina lecziun d'englais per emna damain che las scolaras ed ils scolars dal territori tudestg e rumantsch. Cunzunt en vista a la midada al stgalim secundar II porta quai dischavantatgs.
En il rom da l'introducziun dal Plan d'instrucziun 21 spetgan adattaziuns cumplessivas da las tavlas da lecziuns en tut las regiuns linguisticas. L'augment anticipà da las lecziuns d'englais en las scolas talianas è cumpatibel cun il Plan d'instrucziun 21, uschia ch'i na dovra pli naginas adattaziuns per il rom englais, cur ch'il Plan d'instrucziun 21 entra en vigur. 

Promover vinavant la vendita da muvel
Il chantun promova la vendita d'animals da niz cun sustegnair activitads da reclama sco er mesiras per distgargiar il martgà. La realisaziun da questas mesiras po vegnir surdada ad in'organisaziun agricula. En il Grischun procura la graubündenVIEH SA per ina vendita optimala dal muvel. Sco indemnisaziun pauschala survegn ella per l'onn current 106 000 francs per quest intent. Per l'organisaziun dals martgads publics da muvel da maz vegn pajada ina contribuziun da basa da 140 000 francs. Vitiers vegnan contribuziuns per chau per arments, per nursas e per chauras. Ultra da quai vegn il martgà da nursas e da chauras promovì er quest onn cun ina contribuziun da 6 francs per animal commerzialisà. Partind da 20 000 animals resulta ina contribuziun totala da var 120 000 francs per onn. Per nursas che vegnan vendidas e transportadas davent en las vals dal sid vegn pajada ina contribuziun da transport da 4 francs per animal.
La politica agrara federala 2014 – 2017 che cuntegna il nov sistem da pajament direct surlascha la tratga d'animals cumplettamain a las reglas dal martgà liber, perquai ch'ils pajaments directs che sa refereschan a l'animal crodan davent. En quest senn conceda il chantun ina contribuziun da 90 000 francs per l'amortisaziun dal center da commerzialisaziun da muvel a Cazas. Uschia duain vegnir realisadas cundiziuns generalas favuraivlas per la commerzialisaziun da muvel en il Grischun. 

La regenza sustegna il program da promoziun dal sport GKB SPORTKIDS
La regenza sustegna il project GKB SPORTKIDS cun ina contribuziun or dal fond da sport. Per ils onns da trenament 2015 fin 2018 conceda ella maximalmain 500 000 francs.
GKB SPORTKIDS è in program da promoziun dal sport per uffants da 5 e 6 onns dal chantun Grischun ed è vegnì lantschà l'atun 2004. Il program ha la finamira da promover la motorica generala dals uffants, da cumbatter gia durant l'uffanza cunter la mancanza pli e pli gronda da moviment e da promover l'access a las uniuns da sport. Actualmain treneschan circa 550 uffants en 33 lieus da trenament.
-

La regenza sustegna la midada e l'engrondiment da la chamona dal Piz Durschin a Breil
La regenza approvescha ina contribuziun chantunala da maximalmain 91 000 francs or dal fond da sport per midar ed engrondir la chamona dal Piz Durschin (Bifertenhütte) a Breil.
La chamona è en possess dal Club alpin academic Basilea (AACB) ed ha dapi intgins onns in'ustaria durant ils mais da stad. Quai correspunda als basegns da las alpinistas e dals alpinists en il chantun Grischun e garantescha che la chamona saja en in bun stadi. L'infrastructura existenta n'ademplescha dentant betg pli las pretensiuns d'ozendi ed er betg las exigenzas dal dretg da victualias. Per pudair manar la chamona er vinavant a favur da l'alpinissem dovra il AACB contribuziuns dal maun public. Ils chantuns Basilea-Citad e Basilea-Champagna han gia garantì contribuziuns.

La regenza approvescha la revisiun parziala da la planisaziun locala da La Punt Chamues-ch
La revisiun parziala da la planisaziun locala, concludida da la vischnanca da La Punt Chamues-ch ils 21 da november 2014, vegn approvada da la regenza. Sco singuls meds da planisaziun èn vegnids approvads la revisiun parziala da la lescha da construcziun, il plan da zonas, il plan general da furmaziun ed il plan general d'avertura 1:1000 "Truochs / La Resgia". Tras questa revisiun parziala vegnan stgaffidas las basas da la planisaziun d'utilisaziun per realisar in lieu d'abitar e da lavur en il territori "Truochs / La Resgia".
 

Gremi: regenza
Funtauna: rg chanzlia chantunala dal Grischun
Neuer Artikel