Navigation

Inhaltsbereich

  • Erste Mitteilung
  • Neuen Beitrag einfügen
En sia ultima sesida ha la regenza grischuna beneventà adattaziuns da la maturitad professiunala federala. Plinavant ha ella acceptà il project per la correcziun da la via d'Engiadina ed il project per midar e per sanar il center da furmaziun Palottis a Schiers.

Basa legala per la collocaziun e per l'assistenza da fugitivs minorens betg accumpagnads
La regenza grischuna ha deliberà per mauns dal cussegl grond la missiva tar ina revisiun parziala da la lescha davart il sustegn da persunas basegnusas. La finamira da la revisiun è quella da stgaffir ina basa legala, tenor la quala il chantun po manar atgnas structuras per la collocaziun e per l'assistenza da fugitivas e fugitivs minorens betg accumpagnads (FMBA). Tut ils custs per ils FMBA èn chaussa da las vischnancas. En l'avegnir na duai betg mo la vischnanca da dimora respectiva stuair surpigliar quests custs, mabain tut las vischnancas grischunas en moda proporziunala e solidarica.
Il dumber da las requirentas e dals requirents d'asil minorens betg accumpagnads (RMBA) è s'augmentà ils onns 2014 e 2015 en moda surproporziunala cumpareglià cun las dumondas d'asil che s'augmentan gia fitg ferm. Tenor la convenziun davart ils dretgs da l'uffant da las naziuns unidas èn ils RMBA suttamess ad ina protecziun speziala ed han il dretg d'assistenza, d'accumpagnament e d'integraziun. En questa fasa da la procedura è cumpetent il chantun, er areguard la finanziaziun. Uschespert che persunas minorennas betg accumpagnadas vegnan renconuschidas sco fugitivas e fugitivs (FMBA), han ellas il dretg da prender residenza per adina en Svizra. La responsabladad passa a las vischnancas, nua che las persunas han lur domicil. Per tegnair quint dals basegns specifics dals FMBA en vista ad ina vita autonoma ed economicamain independenta dovri purschidas e mesiras adequatas.
Perquai ch'igl è fitg urgent da realisar furmas da collocaziun e d'assistenza adequatas per las fugitivas ed ils fugitivs minorens betg accumpagnads e da reparter ils custs che resultan sin tut las vischnancas, ha la regenza decidì da desister d'ina consultaziun externa. Mo uschia poi vegnir garantì che la regulaziun legala possia vegnir messa en vigur per il 1. da schaner 2017.
Igl è previs da tractar la missiva en il cussegl grond durant la sessiun d'avust 2016.

La regenza beneventa adattaziuns da la maturitad professiunala federala

La regenza grischuna prenda posiziun tar la revisiun parziala da l'ordinaziun davart la maturitad professiunala federala (OMPr). Cun questa revisiun vegn stgaffida la basa legala per che resultats d'examens da diplom possian vegnir transfurmads en notas. Questa moda da transfurmaziun na vala betg mo per diploms da linguas estras acquistads, mabain er per examens da diplom betg reussids, sche quels èn renconuschids dal secretariat da stadi per furmaziun, retschertga ed innovaziun (SEFRI) e n'èn betg pli vegls che 3 onns.
La regenza grischuna beneventa las midadas da la OMPr. Cun la nova regulaziun legala na dependa la transfurmaziun da prestaziuns betg pli mo dal fatg che l'examen da diplom da linguas estras saja reussì. Quai permetta da renconuscher sut tschertas circumstanzas prestaziuns gia ademplidas. Cunquai ch'ils diploms da linguas estras survegnan adina dapli impurtanza en il martgà da lavur pli e pli internaziunal, sto questa valitaziun vegnir sustegnida ord vista da la strategia da furmaziun.
La regenza grischuna è però da l'avis ch'i na saja betg necessari da fixar in termin da valaivladad per ils diploms da linguas estras. Questa regulaziun cuntrafa al princip che prestaziuns da furmaziun ch'èn vegnidas ademplidas pli baud na duain betg scader. La perioda tranter l'absolver ils diploms da linguas e la maturitad professiunala è per regla curta ed ina restricziun supplementara da la valaivladad da prestaziuns da furmaziun ademplidas n'è betg cunvegnenta.

A partir dal zercladur 2016 è permessa la vaccinaziun en l'apoteca
A partir dal cumenzament dal zercladur pon ins laschar sa vaccinar en il chantun Grischun en l'apoteca cunter la grippa, cunter l'inflammaziun dal tscharvè e cunter hepatitis. La regenza ha concludì ina revisiun parziala correspundenta da l'ordinaziun tar la lescha da sanadad. Uschia vegn stgaffida la basa legala per che apotecras ed apotechers possian far tschertas vaccinaziuns senza in recept da la media u dal medi.
Las persunas che dastgan vegnir vaccinadas ston esser saunas e ston avair almain 16 onns. Per giuditgar il stadi da sanadad ston las apotecras ed ils apotechers obtegnair ina scolaziun ed ina furmaziun supplementara correspundenta.

Promover vinavant la vendita da muvel

Il chantun promova la vendita d'animals da niz cun sustegnair activitads da reclama sco er mesiras per distgargiar il martgà. La realisaziun da questas mesiras po vegnir surdada ad in'organisaziun agricula. En il Grischun procura la graubündenVIEH SA per ina vendita optimala dal muvel. Sco indemnisaziun pauschala survegn ella per l'onn current 106 000 francs per quest intent. Per organisar ils martgads da muvel da maz publics na vegn da nov betg pli pajada ina contribuziun da basa. Percunter vegnan dublegiadas las contribuziuns per chau per arments, per nursas e per chauras. Quest sistem che dependa da la prestaziun duai animar la graubündenVIEH SA da vender uschè blers animals sco pussaivel sur il martgà public. Per promover il martgà da nursas e da chauras vegn concedida sco fin ussa ina contribuziun da preschentaziun dad en media 6 francs per animal commerzialisà. Per nursas che vegnan vendidas e transportadas davent en las vals dal sid vegn pajada supplementarmain ina contribuziun da transport da 4 francs per animal.
La politica agrara federala 2014 – 2017 che cuntegna il nov sistem da pajament direct surlascha la tratga d'animals cumplettamain a las reglas dal martgà liber, perquai ch'ils pajaments directs che sa refereschan a l'animal crodan davent. En quest senn conceda il chantun ina contribuziun da 90 000 francs per l'amortisaziun dal center da commerzialisaziun da muvel a Cazas. Uschia duain vegnir realisadas cundiziuns generalas favuraivlas per la commerzialisaziun da muvel en il Grischun.

Approvà la correcziun da la via d'Engiadina
La regenza ha approvà il project per la correcziun da la via d'Engiadina cun intginas cundiziuns sco er cun las permissiuns spezialas. Il project da via concerna il traject da Zernez fin Susch. Tranter las duas galarias Ova Sparsa e Sassella è la via en in nausch stadi. Ultra da quai na satisfa quest traject betg pli a las pretensiuns da segirezza ed als basegns actuals (p.ex. ladezzas permessas dals vehichels). La via è memia stretga e da la vart mancan per part pussaivladads da guntgida. Cun il project avant maun vegn la via d'Engiadina schlargiada a la ladezza da 7 meters ch'è previsa en il program da construcziun da vias. Uschia duai vegnir augmentada la segirezza dal traffic. La via d'Engiadina è l'axa da traffic la pli impurtanta da l'Engiadina. Ella è l'unica colliaziun da via tranter l'Engiadin'ota e l'Engiadina bassa sco er tranter ils pass dal Malögia, dal Güglia, dal Bernina, da l'Alvra, dal Fuorn e dal Flüela. -

Sanaziun dal center da furmaziun Palottis a Schiers

La regenza approvescha il project per midar e per sanar il tract C dal center da furmaziun Palottis a Schiers. A l'uniun "Center da furmaziun Palottis" vegn garantida ina contribuziun da construcziun da totalmain 1,43 milliuns francs.
Il tract C è vegnì construì l'onn 1972 sco engrondiment dal center da furmaziun. En connex cun midadas da construcziun pli grondas ils onns 1998/99 è vegnì installà tranter auter in ascensur da persunas en il tract C. Sco proxima mesira architectonica duain ussa tut las chombras d'internat survegnir in agen local sanitar. En quest connex è er planisada ina sanaziun totala energetica da quest tract. Suenter la renovaziun stattan a disposiziun 67 letgs (30 en il tract A e 37 en il tract C).

L'ordinaziun davart il cataster da conducts vegn messa en vigur
La regenza grischuna metta en vigur per il 1. da zercladur 2016 las disposiziuns da la lescha chantunala da geoinfurmaziun. Cun l'entrada en vigur vegn er relaschada l'ordinaziun davart il cataster da conducts. L'ordinaziun regla co manar e duvrar ils catasters communals dals conducts.
La lescha chantunala da geoinfurmaziun oblighescha las vischnancas da manar in cataster dals conducts. Il cataster inditgescha la situaziun geografica dals conducts permanents sin il territori communal (per exempel electricitad, aua, telecommunicaziun). El sa basa sin indicaziuns da las proprietarias e dals proprietaris da las differentas ovras.

La regenza approvescha la revisiun parziala da la planisaziun locala da Domat

La revisiun parziala da la planisaziun locala da la vischnanca da Domat, ch'è vegnida concludida ils 28 da favrer 2016, vegn approvada da la regenza. Sco singuls meds da planisaziun vegnan approvads ina revisiun parziala da la lescha da construcziun (nov art. 29 davart la zona d'industria C) sco er il plan general da furmaziun 1:2000 "Vial-Tuleu".
La revisiun parziala duai pussibilitar novas utilisaziuns en la zona d'industria. Fin ussa era questa zona utilisabla unicamain per domiciliar interpresas dal sectur che elavurescha laina. Cun la revisiun parziala da la lescha da construcziun vegn ella ussa er averta per interpresas independentas dal sectur da laina. Uschia vegn stgaffida la basa per domiciliar interpresas cun ina gronda intensitad da valurisaziun ch'èn orientadas a l'export e che han plazzas da lavur qualifitgadas. L'opziun d'installar ina resgia redimensiunada sin ina surfatscha reducida resta resalvada.


Gremi: regenza
Funtauna: rg chanzlia chantunala dal Grischun
Neuer Artikel