Navigation

Inhaltsbereich

  • Erste Mitteilung
  • Neuen Beitrag einfügen

La Procura publica e la Polizia chantunala dal Grischun ston adina puspè s'occupar da denunzias pervia d'engions cun investiziuns finanzialas online. Intginas da las persunas donnegiadas han pers daners da la cassa da pensiun, ch'ellas avevan retratg anticipadamain, ad ina persuna nunenconuschenta.

La Polizia chantunala dal Grischun avertescha quest onn gia per la terza giada (guardar las communicaziuns a las medias dals 21 da favrer 2020 e dals 16 da fanadur 2020) d'engions cun investiziun da daners online. En in cas ch'è vegnì denunzià l'atun 2020 ha in um investì passa 600 000 francs ed ha pers ils daners.

In cumbat invan? Betg sch'ins è realistic!
Ils bunamain 40 cas ch'èn vegnids denunziads fin l'onn 2018 a la Procura publica ed a la Polizia chantunala dal Grischun – la summa totala da delict importa quasi 3 milliuns francs – pudessan laschar concluder ch'il cumbat è invan e che las stentas da prevenziun sa perdan svelt. Pertge avertescha la Polizia chantunala dal Grischun pia danovamain e cun insistenza da betg far transacziuns da daners online cun persunas – sco ch'i sa mussa pli tard – nunenconuschentas. In pitschen gieu da rollas: Ch'ins s'imagineschia da surdar ad ina persuna nunenconuschenta – per il solit a l'exteriur – simplamain uschia ina summa considerabla da daners spargnads u er retratgs anticipadamain da la cassa da pensiun per als laschar multiplitgar en moda miraculusa. Sch'ins è realistic ston ils aspects "persuna nunenconuschenta" e "multiplicaziun miraculusa" manar obligatoricamain a la conclusiun, ch'i sa tracta qua pli probabel da criminalitad organisada e ch'ins duai laschar la detta da tals affars dubius!

La Polizia chantunala dal Grischun fa endament ils suandants puncts:
- discutar investiziuns cun la banca u cun la cussegliadra / il cussegliader da confidenza;
- en nagin cas spedir copias da la carta d'identitad u dal passaport,
- betg far investiziuns sut squitsch da temp,
- betg laschar sa tschorventar d'ina preschentaziun professiunala,
- far mo investiziuns da daners ch'ins chapescha.

Infurmaziuns davart quest tip d'engion chattais Vus sin la pagina da la Surveglianza dals martgads da finanzas (finma).

 

-
Illustraziun: unsplash

 

Neuer Artikel