Ils fatgs d'assicuranza dal chantun Grischun èn organisads en moda centrala. L'Administraziun da finanzas ha il status d'in «inhouse broker» ed è cumpetenta per concluder ils contracts d'assicuranza, per liquidar donns sco er per furmar retenziuns a favur da ristgas betg assicuradas (art. 33 al. 2 OFC, DG 710.110). Sin basa da quai elavura ella er ils cas da donn da tut las unitads administrativas, dals manaschis e dals instituts cunassicurads sco er da las dretgiras chantunalas. Exceptads da sia cumpetenza èn ils cas da donn tenor la LAA.
Incumbensas
Las incumbensas principalas èn il management da las assicuranzas, il management da las ristgas en chaussas tecnicas d'assicuranza e la regulaziun dals donns. L'Administraziun da finanzas è er responsabla per la submissiun da las assicuranzas dal chantun Grischun. Per quest intent applitgescha ella la Lescha da submissiun (Lsub, DG 803.300). La partiziun Fatgs d'assicuranza procura per ina garanzia optimala tras l'assicuranza en ils secturs da ristga dal chantun che vegnan considerads sco degns d'esser assicurads. Plinavant cusseglia ella las unitads administrativas, ils manaschis ed ils instituts cunassicurads sco er las dretgiras chantunalas en dumondas d'assicuranza e da ristga. Ella è l'emprim post da consultaziun per ils temas d'assicuranza, particularmain per dumondas davart las garanzias d'assicuranza e davart las resalvas persunalas en las unitads administrativas sco er per dumondas davart l'annunzia da las ristgas assicurablas. La responsabladad per las ristgas han – en moda decentrala – las unitads administrativas.
Cas da donn
La partiziun Fatgs d'assicuranza è il post da coordinaziun per liquidar ils cas da donn assicurads e betg assicurads ed il post spezialisà central per elavurar las pretensiuns d'indemnisaziun da donns, che vegnan pronunziadas envers il stadi e che pertutgan la responsabladad dal stadi. Sch'i capita in cas da donn, sto vegnir transmessa in'annunzia dal donn en scrit a l'Administraziun da finanzas. Exceptads da quai èn ils cas da donn che l'Assicuranza d'edifizis sto tractar sco er ils cas da donn tenor la LAA. Per ils donns che pertutgan assicuranzas da persunas è responsabel l'Uffizi da persunal (annunzia d'accident). Ils cas da donn pon vegnir annunziads mo da collavuraturas e collavuraturs da l'administraziun chantunala e da las dretgiras sco er d'ulteriuras persunas assicuradas tras il chantun.