Ils 9 da november 2023 ha gì lieu il Di naziunal da l'avegnir da quest onn. La finamira da quest di è stada quella, da sensibilisar las mattas ed ils mats uschè baud sco pussaivel per ina tscherna averta da la professiun e d'als pussibilitar ina «midada da vart»:

Al Di da l'avegnir han las scolaras ed ils scolars da la 5. fin 7. classa gì la pussaivladad d'explorar in sectur da lavur ch'è plitgunsch nunusità per lur schlattaina. Quel di han ellas ed els pudì emprender ad enconuscher ina professiun ord proxima distanza. Quai ubain cun accumpagnar ina persuna da referiment a la plazza da lavur ubain cun sa participar ad in dals differents projects spezials.

Ils projects spezials èn vegnids organisads e realisads tras divers posts da servetsch da l'administraziun chantunala dal Grischun. Els èn vegnids purschids entaifer champs da lavur che han grondas quotas da dunnas resp. d'umens. En il champ dals fatgs da persunal, ch'è plitgunsch dominà da dunnas, ha l'Uffizi da persunal per exempel realisà quest onn in project spezial per mats cun il titel «In di sco spezialist da resursas umanas».

Sco gia l'onn passà han ils uffants survegnì a la fin dal Di da l'avegnir in pitschen regal, ch'è vegnì mess a disposiziun da l'Uffizi da persunal.

En moda e maniera attractiva ha l'administraziun chantunala dal Grischun pudì render attent quel di a sias pussaivladads da lavur multifaras. Betg mo las mattas ed ils mats, mabain er las persunas d'instrucziun, ils geniturs e las persunas da referiment èn vegnids a savair dapli davart las perspectivas professiunalas pussaivlas.