Superiur(a) direct(a) u proxim(a) superiur(a)

Sche las collavuraturas ed ils collavuraturs giavischan cussegliaziun u sustegn en cas da problems pervia da la lavur, dastgan ellas ed els natiralmain sa drizzar er vinavant a lur superiur(a) direct(a) u a lur proxim(a) superiur(a).

Er en cas d'indizis concrets ch'i dettia incunvegnientschas, pon las collavuraturas ed ils collavuraturs sa drizzar a lur superiur(a) direct(a) u a lur proxim(a) superiur(a). Sche las incunvegnientschas na vegnan betg eliminadas, suenter ch'ellas èn vegnidas tematisadas internamain, u sch'i resultan conflicts d'interess, pon e duain ellas vegnir annunziadas al Post independent per l'annunzia d'incunvegnientschas.

Post da cussegliaziun psicologica

La promoziun da la sanadad è dapi l'onn 2004 in element da la buna direcziun e dal management da sanadad da l'administraziun chantunala.

Per quest motiv è vegnì stgaffì l'onn 2007 in post anonim e professiunal da cussegliaziun psicologica en cas da grevezzas psichicas pervia da la lavur (p.ex. burnout, schliaziun da conflicts cun collavuraturas e collavuraturs, cun superiuras e superiurs u en il team), en cas da violaziuns da l'integritad persunala (p.ex. mobing, discriminaziun e mulestas sexualas) sco er en cas da problems da dependenza.

La cussegliaziun dal Post da cussegliaziun psicologica è gratuita, cumpetenta e confidenziala. A las collavuraturas ed als collavuraturs mussa il post vias per schliar ils conflicts e porscha sustegn tar la soluziun dals problems.

As infurmai davart il Post da cussegliaziun psicologica.

Post per l'annunzia d'incunvegnientschas en il sectur dal persunal

En il rom da la revisiun parziala da la Lescha dal persunal è vegnì stgaffì l'onn 2023 in post independent per l'annunzia d'incunvegnientschas en il sectur dal persunal, quai per rinforzar la compliance e l'integritad da las collavuraturas e dals collavuraturs.

Il post d'annunzia independent vegn manà da la firma IntegrityPlus SA, Turitg. A quest post pon las collavuraturas ed ils collavuraturs annunziar da nov incunvegnientschas al plaz da lavur u en il manaschi – quai, sch'i vegn giavischà, er en furma anonima. Confurm a la lescha è il chantun Grischun obligà da proteger las persunas, che fan sinceramain in'annunzia, cunter discriminaziuns (p.ex. disditga, degradaziun en l'ierarchia e tut ils ulteriurs obstachels per la carriera, donns psichics e la toleranza da tals). Persunas che fan intenziunadamain annunzias faussas u engianusas u che inoltreschan annunzias disfamantas, n'èn percunter betg protegidas tras il dretg da lavur e/u tras il dretg penal.

En cas d'indizis concrets ch'i dettia incunvegnientschas, pon e dastgan las collavuraturas ed ils collavuraturs natiralmain sa drizzar er vinavant a lur superiur(a) direct(a) u a lur proxim(a) superiur(a). Sche las incunvegnientschas na vegnan betg eliminadas, suenter ch'ellas èn vegnidas tematisadas internamain, u sch'i resultan conflicts d'interess, pon e duain ellas vegnir annunziadas al Post independent per l'annunzia d'incunvegnientschas.

As infurmai davart il Post per l'annunzia d'incunvegnientschas en il sectur dal persunal.

Management da sanadad en il manaschi

As infurmai davart differents temas dal sectur Management da sanadad en il manaschi.