Transports da persunas

Tgi che fa regularmain e commerzialmain transports da persunas cun vehichels u bartgas cun pli che 9 plazzas (incl. manischunz), dovra ubain ina concessiun da l'Uffizi federal da traffic (UFT) u ina permissiun chantunala dal chantun Grischun.

Per ils suandants transports da persunas dovri da princip ina permissiun chantunala:

• transports da lavurants
• transports da visitaders (p.ex. bus pendular fin al parcadi)
• viadis tenor basegn (sin dumonda)
• viadis cun bus d'hotel
• transports da scolars
• purschidas da traffic senza funcziun d'avertura (p.ex. bus per ir a viandar u per far turas da skis)

Excepziuns

Nagina permissiun u concessiun na dovri per:

• transports cun vehichels che han maximalmain 9 plazzas incl. il manischunz (cat. B)
• transport sulettamain da persunas cun impediments
• viadis che vegnan purschids regularmain e tenor urari durant maximalmain 14 dis successivs entaifer in onn (events)
• transports da scolars che vegnan fatgs da persunas emploiadas da la vischnanca cun vehichels da la vischnanca (nagin intent commerzial)

Dumondas

Cumpetent per la procedura da la permissiun chantunala è l'Uffizi d'energia e da traffic (UEnTr). La dumonda sto vegnir inoltrada il pli tard 3 mais avant il cumenzament dal servetsch planisà u avant midadas da la permissiun via ePortal (midada da possessur, prolungaziun dal servetsch, aboliziun e.u.v.).

Cumenzament dal servetsch da transport

Il servetsch da transport dastga vegnir cumenzà pir, cura che la permissiun è vegnida concedida. Ils vehichels utilisads ston observar las pretensiuns tecnicas e correspunder a las premissas d'admissiun.

Annunziar midadas

La midada da vehichels ed autras midadas essenzialas ston vegnir annunziadas immediatamain a l'Uffizi d'energia e da traffic.

Licenza per interpresas

Per il transport commerzial da persunas cun vehichels cun pli che 8 sezs ultra dal sez dal manischunz, dovri in'admissiun sco interpresa da transport sin via (licenza).

La permissiun d'admissiun vegn concedida da l'Uffizi federal da traffic (UFT). (mo per tudestg)