En il rom da la procedura chantunala d'urari elavura il chantun Grischun en collavuraziun cun las regiuns d'urari e cun las interpresas da transport la purschida dal traffic public per ils proxims onns.
La procedura sa drizza tenor las prescripziuns ed ils termins da l'Uffizi federal da traffic (UFT). Las periodas d'urari èn da princip concepidas per 2 onns e cumenzan mintgamai ils onns spèrs.
Durant ils onns pèrs tranteren vegnan fatgas per regla mo adattaziuns pli pitschnas da la pruschida.

Il chantun Grischun sa stenta da meglierar cuntinuadamain la purschida dal traffic public resguardond las circumstanzas finanzialas.
En il rom da la procedura d'urari han regiuns, vischnancas, interpresas sco er persunas privatas la pussaivladad da sa participar cun giavischs e propostas.
Questas propostas e quests giavischs vegnan examinads da l'Uffizi d'energia e da traffic, da las presidentas e dals presidents d'urari sco er da las interpresas da transport participadas, accordads cun las regiuns vischinantas e resguardads tant sco pussaivel.

Presidentas e presidents d'urari
Las presidentas ed ils presidents d'urari tschernids da la Regenza èn responsabels per la concepziun detagliada da la procedura d'urari en lur regiun respectiva. Tar lur incumbensas tutgan tranter auter:

• infurmar supplementarmain la publicitad (p. ex. sur medias regiunalas)
• infurmar directamain las vischnancas e las gruppas d'interess
• organisar e realisar conferenzas regiunalas d'urari

L'Uffizi d'energia e da traffic furnescha ad ellas ed els las propostas per l'urari ch'èn vegnidas inoltradas.
Survista da las presidentas e dals presidents d'urari

Giavischs e propostas
Las propostas ed ils giavischs concernent l'urari pon da princip vegnir inoltrads durant l'entir onn. Pervia dal temp ch'è necessari per preparar l'adattaziun, duessan propostas pli voluminusas vegnir inoltradas almain 1 onn ordavant, dentant fin il pli tard ils 09-06-2026, per ch'ellas possian vegnir examinadas sin la midada d'urari da mez december 2026 (urari 2027). Per inoltrar propostas d'urari stat a disposiziun il ePortal dal chantun Grischun.

Sco alternativa pon propostas e giavischs er vegnir inoltrads per e-mail u per posta:

E-mail
fahrplanentwurf@gr.ch 

Adressa postala
Uffizi d'energia e da traffic
Partiziun Traffic public
Ringstrasse 10
7001 Cuira.

Sboz da l'urari 2027
Il sboz da l'urari 2027 po vegnir consultà publicamain dals 22 da matg fin ils 9 da zercladur 2026 sin la plattafurma oev-info.ch.