Il monitoring dals lufs en l'Engiadina Bassa ha mussà duas novas enconuschientschas per la fin da l'onn:

Pliras emprovas da DNA, tranter auter da lufs sajettads durant la regulaziun mussan ch'ils lufs supponids sco triep da lufs Clemgia èn quels dal triep dal Sinestra. Perquai ch'ins ha constatà a partir da mez settember en la Val Sinestra sco er ca. 14 kilometers da quels en la Val S-charl chagniels lufs en la Val S-charl, è il UCP partì il cumenzament d'october 2025 da dus trieps da lufs independents (cf. communicaziuns sin la pagina d'internet dal UCP dals 24.09.2025 e dals 10.10.2025). A maun dals resultats genetics ils pli actuals na datti pia naginas indicaziuns per in triep da lufs da la Clemgia (cf. charta dals trieps da lufs).

La stad 2025 ha il triep dal Sinestra dumbrà dus lufs creschids sco er set lufs giuvens. En il rom da la regulaziun dal triep dal Sinestra èn pia vegnids sajettads fin la fin da december sis lufs, da quels tranter auter la luffa dominanta.

Durant las ultimas duas emnas èn vegnidas constatadas en il territori da Tarasp e da la Val S-charl fin a Ramosch sco er da tuttas duas varts da la Val Sinestra en il fratemp passa 20 cumprovas d'in pèr da lufs cun in luf mastgel cleramain da colur naira. Els n'èn betg lufs dal triep dal Sinestra. Quest pèr da lufs è protegì tras il dretg federal.

La regulaziun dal triep da Sinestra sto vegnir cuntinuada fin la fin da schaner resguardond correspundentamain la preschientscha da quest pèr.