Navigation

Inhaltsbereich

La partiziun "portfolio" da l'uffizi da construcziun auta ademplescha la direcziun strategica dal manaschament dal portfolio d'immobiglias da las immobiglias ch'il chantun Grischun posseda (facultad administrativa e finanziala) e dals objects da locaziun ch'il chantun dovra e ch'èn en proprietad da terzs. Ultra da princips socials, economics ed ecologics sto il manaschament dal portfolio garantir ils interess dals proprietaris, e quai resguardond ils basegns dals utilisaders. Per quest intent è vegnida elavurada ina strategia per il portfolio d'immobiglias cun plirs stgalims.

 Strategia per il portfolio d'immobiglias

L'analisa e la structuraziun da l'effectiv d'immobiglias inclusiv la furmaziun da portfolios parzials e la formulaziun da strategias a lunga vista garanteschan in manaschament d'immobiglias transparent e planisabel. Las immobiglias vegnan – confurm a l'intent, per il qual ellas vegnan duvradas – dirigidas ed administradas tenor differentas strategias parzialas. Sin basa da las prescripziuns da las strategias parzialas per il portfolio e da las qualitads specificas per l'object vegnan fixadas strategias d'object per ils singuls edifizis.

Per registrar il stadi architectonic e per eruir il basegn futur da mantegniment e da renovaziun d'edifizis sco er ils custs prognostizads ed ils onns, cura che questas mesiras ston vegnir exequidas, stattan a disposiziun instruments da lavur correspundents. Quels pussibiliteschan evaluaziuns e ratings sin plaun dals objects, dals portfolios parzials u dal portfolio general.